UFC champion Daniel Cormier chuan San Jose, California a zirna in pakhat, Gilroy High School sawmna chu pawmin, he sikula an program pakhat wrestling lamah head coach a ni dawn.

Kum 39 a upa Cormier hi UFC light heavyweight champion niin July 7 khian UFC 226 ah Stipe Miocic nen heavyweight title an inchuh dawn a, hemi tur hian Daniel Cormier pawh hi a inbuatsaih nasa tan hle a. Cormier hi U.S. Olympian hlui niin, San Jose khuaa American Kickboxing Academy ah pawh team captain a ni bawk.

Daniel hian vawi engemawzat chu kum 40 a pelh hnu chuan UFC hi a bansan tur thu a lo sawi tawh a, heti a nih chuan nakum March thla thleng chu a la insual thei dawn a. Zirlai infiammite hnena coaching pek lampang hi a hma pawha UFC chawlhsan hnua a tih tur zingah a sawi tel a ni.

“Kan khuaah hna tha tak mai a awm remchang hlauh mai a, keima tan a that mai piah lamah ka fapa tan tak pawh a tha em mai a, rang takin ka pawm ta mai a ni,” tiin Cormier chuan a sawi a.

A sawi zelnaah, “Ka fapa hi kum 7 a ni a, AKA ah hian thurualpui thahnem tak a nei bawk a. Wrestling lama tui thian a neih belh zel a, hei hi a hma lam hun atan pawh a tha em em a ni,” a ti bawk.

“Naupang hoin high school an pan chhoh zelnaah nasa takin tuna an program hian kawngro a su ngei dawn a, theih anga thain naupang hi keima hoin kan buatsaih chho dawn a. Coach lar leh tha tak takin heng naupangho tan hian kawng an sialsak ngei theihna turin tan kan la ang a. He sport hian ka tan thil tha tak tak min tihsak nasa tawh a, tunah chuan he infiamna atan hian thil tha ka tih let ve a hun ta a ni,” tiin Cormier hian a sawi.

MMAFighting in an tarlan dan chuan Daniel Cormier hian Gilroy High School atanga hlawh a lak chu assistant coach te pek vek a tum a ni.

Cormier hian Oklahoma State University atangin wrestling hi a luhchilh tan a, 2004 leh 2008 khan U.S. Olympic team-ah a tel phak nghe nghe a. 2015 khan UFC light heavyweight championship title a la a, he title hi vawi 3 chu a vawnghim tawh a ni.