Aizawl | August 27, 2025: 1st NSCI Heyball National Championship 2025 neih zawh takah Mizoram Snooker & Billiards Association (MSBA) player Lalrina Renthlei, Tuikhuahtlang chu India Heyball Rank no. 5 niin a lo haw.

Delhi khawpuia 1st NSCI Heyball National Championship 2025 neih zawh takah Lalrina Renthlei chu Quarter finalist niin, August 25 zan khan Sundeep Gulati (Delhi) nen Quarter Final an khel a, a vanduai zawkah a tang a. Mahse, a tukah ranking match an khel a. Heyball-ah medal la pha lo mahse, India rank no 5 a ni ta a ni.

August 26 Thawhlehni-aa Ranking match-ah Delhi player Avinash Kumar leh Petroleum Sports Promotion Board (PSPB) player Shabaaz Adil Khan chu 5 - 2 ve vein a hneh a,  in hneh a, India Heyball Rank no 5 a ni ta a ni.

Heti hian Lalrina Renthlei hi Cue Sport National top 10 - ah vek a awm a,  Pool - 9 Ball-ah No 4, 10 Ball-ah No 5, Heyball-ah No 5 leh Snooker-ah No 9 te a ni.

Chuan tun october hian World 8 Ball Pool Championship, Bali ah slot pek a ni a, mahse, rokhawlhna avangin a tel thei dawn lo a ni.

Tarlan tawh angin, Lalrina hian August 25 zan dar 5:30 khan Quarter final-ah Sundeep Gulati (Delhi) a hmachhawn a, inkhelh hmuhnawm tak an entir a, mahse, Lalrina hi a vanduai zawkah ṭangin 9 - 6 in Sundeep Gulati hi a chak a ni. Quarter final a hneh loh Sundeep Gulati (Delhi) hi a champion zui ta a ni.

Lalrina hian, August 25 chawhma khan Indian player țha Praveen Mane (Karnataka) chu 9 - 8 a hnehin Quarter final hi a lut a ni.

Lalrina hian August 24 zing leh zan khan match a nei ve ve a, zan dar 10 hnu lama an match-ah a khelhpui Petroleum Sports Promotion Board (PSPB) player Laxman Rawat-in  6 - 2 a hma a hruai hnuin, theihtawp a chhuah a, a theihna leh thiamna fim tak hmangin, 9 - 6 in a chak ta a ni.

Heyball an khelhna ang table hi Mizoram Snooker & Billiards Association (MSBA)-in an neih ve loh avangin player te tan inbuatsaih a theih lova, Pool table pangngaia inbuatsaih an nih avangin a hmun an thleng a, an han khel ta a, ball kal dan a lo danglam nasa hle a, chu chu MSBA player tam zawk thlen san tawk loh chhan niin sawi a ni a. Heyball Pool khelhna tur table-ah rual an awt hle niin sawi a ni.

August 17 - 26, chhunga Delhi khawpuia neih 1st National Sports Club of India (NSCI) Heyball National  Championship 2025-ah hian Mizoram Snooker & Billiards Association (MSBA) aiawhin Player pasarih leh official pahnih nen, an vaiin mi pakua an kal a. Heyball Championship hi NSCI leh Major Dhyan Chand National Stadium-ah khelh a ni a. Mizoram Player te'n India rama Heyball National Championship hmasa ber-ah thawm an nei lian hle.

August 24:
📍10:45 AM: Lalrina Renthlei  7 - 0 Kunal Wadhawan (DEL) | Round of 64
📍 10:00 PM: Lalrina Renthlei 9 - 6 Laxman Rawat (PSPB) | Round of 32

August 25:
📍 10:00 AM: Lalrina Renthlei 9 - 8 Praveen Mane (Karnataka) | Round of 16
📍 5:30 PM: Lalrina Renthlei 6 - 9 Sundeep Gulati (DEL) | Quarter Final

August 26 | Ranking Match
📍 Lalrina Renthlei 5 - 2 Avinash Kumar (DEL)
📍 Lalrina Renthlei 5 - 2 Shabaaz Adil Khan (PSPB)