Zirtawpni zan khan France chuan si hnih faiin Ukraine an hneh a, Olise leh Mbappe te chuan goal khungin, French striker hian ram tan goal 51 a khung tling ta.

France tan Thierry Henry chuan goal 51 a khung a, Henry-a record hi Kylian Mbappe chuan a nihrual ta chiah, Real Madrid striker hian Henry-a record hi khum a duh thu a sawi nghal bawk.

Olise-a goal khung zawh second half-ah Mbappe chuan Tchouaméni-a ball pek ṭha tak chu umin, defender Zabarnyi a bum hnuah bottom corner-ah mawi takin a chhuih goal a, kum 26 lek ni chungin Henry-a goal khung zat chu a nihrual ta a ni.

"Henry-a goal khung zat hi khum ka duh a ni, hetia a goal khung zat ang ka khung ve ta chiah pawh hi ka tan chuan inchhuanna tham a ni ringawt.

"French mipui ten Henry an ngaihhlut zia chu kan hre chiang vek ang. Player naupang tam tak entawn leh kawng sialtu a ni a, kei pawhin ka zahin ka chhuang em em a ni.

"Naupang te ni chunga Henry-a goal khung zat ka nihrual thei hi a mak ka ti, mahse ka lawm khawp mai. Chhunzawm zel ka tum ang. A pawimawi ber erawh hnehna chan a, title lak hi a ni," tiin Mbappe chuan French television channel TF1 a hrilh.

France ram tana goal khung hnem ber chu Oliver Giroud a ni a, ani khan goal 57 a khung. Giroud hi kum 38 mi niin nikum July thla khan ram tana inkhelh a chawlhsan.

France tana goal khung hnem ber dawttu ni ṭhin chu Henry a ni a, ram tana game 123 a khelh aṭangin goal 51 a khung a, Mbappe hian ram tan game 91 khelin goal 51 a khung tling ta der mai.

France tana goal khung hnem ber nih a tum leh tum loh chungchang an zawhnaah France captain Mbappe chuan, "Goal khung hnem ber nih theihna hun ṭha tak chu ka nei chho mek, ka hnaih ve zel, mahse hetiang lam erawh ka ngaihtuah lem lo.

"Mimal record lam hian ka rilru a luah vak lo, mimal record aia ngaih pawimawh ka ngah a ni," tiin a sawi. France hian kar leh thawhlehni hian World Cup 2026 qualifier match-ah Iceland an hmachhawn leh dawn a ni.