Thawhtanni zan zanlaiah khan 2024 Ballon d'Or winner puan a ni a, Manchester City midfielder Rodri chu Ballon d'Or winner a ni.

Short lists tihchhuah a nih hnuah, FIFA rankings-a top 100 ram chanchinbumite chuan vote an thlak a, kum 2003 hnuah a vawi khat nan Messi leh Ronaldo te chu short list-ah an tel ta lo.

Nikum Ballon d'Or-ah khan Rodri kha 5-na a ni a, kum 28 mi hian Manchester City chu ropui takin League title a lakpui bakah, July thla khan a ram Spain chu Euro 2024 a chawipui bawk.

Tin, UEFA Super Cup leh Club World Cup-ah Manchester City a champion pui bawk a, Vinicius Junior nen Ballon d'Or dawng tura rinkai pahnih an ni a, a tawpah chuan Rodri kutah a tla ta a ni.

"Ka tan, kan chhungkua leh ka ram tan chuan ni duhawm danglam bik a ni. Vawiin hi ka tana hnehna ni a ni bik lo. Spanish football tan a ni.

"He lawmman hlu tak hi Spanish player tha tak tak, dawn phu tak takin an lo dawng tawh lo. Chung zingah chuan Iniesta, Xavi, Casillas, Busquets leh mi dang te an tel. He lawmman hi Spanish football leh midfielder zawng zawng tan a ni.

"Ka thian thahnem takin, 'Football tak takin hnehna a chanh e,' tiin thu min lo thawn hlawm. Midfielder  te hi langsar lo tak tak kan ni a, ngaihven kan hlawh ve ta hi ka lawm a ni," tiin Rodri chuan a sawi.

Ballon d'Or top 10

Rodri (Spain and Manchester City)

Vinicius Jr (Brazil and Real Madrid)

Jude Bellingham (England and Real Madrid)

Dani Carvajal (Spain and Real Madrid)

Erling Haaland (Norway and Manchester City)

Kylian Mbappe (France and PSG/Real Madrid)

Lautaro Martinez (Argentina and Inter Milan)

Lamine Yamal (Spain and Barcelona)

Toni Kroos (Germany and Real Madrid)

Harry Kane (England and Bayern Munich)