Jose Mourinho chuan Eden Hazard thiamna leh a mizia atanga en chuan Real Madrid player tur dik tak a nih thu sawiin, Spain ramah a hlawhtlin a rin thu a sawi.

Mourinho chuan Eden Hazard chungchang hi DAZN Espana hmaah sawiin, “Real Madrid-a khel turin thiamna a nei tha tawk em? Nei tha tehreng mai. Jersey ropui tak mai ha thei tur leh Bernabeu chhunga inkhel entute hmaa tha taka khel thei tur mizia a pu em? Tehreng mai,” a ti.

Belgium midfielder Eden Hazard chuan Chelsea lamah contract a la pawt sei duh rih lo a, nipui transfer window inhawn hma chuan engmah tih fel a tum rih llo a. Thla hmasa khan Chelsea boss Maurizio Sarri chuan Hazard hi season tawp huna Real Madrid zawm tura a duh thu a sawi nghe nghe a ni.

Portuguese coach Mourinho chuan nikum December thlaa Manchester United in an ban hnuah hna chelh a la nei leh lo a, management lam luhchilh leh tawh a duh thu sawiin, kumin nipui hunah chuan club a enkawl leh tawh a beisei thu a sawi chhuak.

Mourinho chuan, “Tuna ka nun hman mek, hun awl tawi te ka neih hi a tawp dawn hnaih tawh ka beisei a, June thla thleng bak awm awl tawh loh hram ni thei se ka ti hle a. Chutih rual chuan keima hmakhua ai mahin mi hmakhua hi ka la ngaihven zawk tho a, eng nge ka tih zel dawn tih lam aiin eng nge midangin an tih zel dawn tih hi ka rilrua lian ber a la ni,” a ti.

“Eden Hazard hi ka hre chiang ve thawkhatin ka hria a, tun hnaiah Stamford Bridge chhuahsan thut thei dinhmuna ding angin thawm a awm a. Hazard hi player tha tak mai a ni a, khawvela club ropui ber Real Madrid lama khel thei tur khawpin a tha a ni tih ka chiang,” a ti bawk.

Chelsea hian Jose Mourinho hnuaiah Premier League title vawi thum an la hman a, Stamford Bridge-ah Hazard hi a lo hrual ve hman bawk a. Hazard hian 2020 thleng Chelsea-ah hian contract a nei a, “Eden thil tum ber hi ka hre mai bik lo a, hun rei tak kan inbe pawp tawh lo a. Mahse, a inkhelh chhungin Chelsea tan a inhmang thei a, club lian Real Madrid lam pawh a pan thei tih bak sawi tur ka hre lo,” a ti.