Eden Hazard chuan Real Madrid-ah a tum angin hun hmang lo viau mah se, a contract zawh hmain Santiago Bernabeu atanga input chhuah mai a tum lo niin a lang.

Belgian forward hian Real Madrid-ah hian season khat dang daih contract a la nei a, nakkum June thlaa a contract a hman zawh hma hian Real Madrid chhuahsan a tum lo tih The Athletic chuan an tarlang.

Real Madrid hian Hazard hi February thla khan an inbia a, Real hian Hazard hi kumin nipuiah chhuah tir dan an zawng niin chanchinbu thenkhat chuan tarlang mah se, Hazard hi season khat dang tal Real Madrid-a la awm leh turin an inbe fel tih The Athletic chuan a tarlang a ni.

Kum 2019 khan beiseina sang tak nen Real Madrid hian Hazard hi Chelsea atangin an lei chhuak a, a manah euro maktaduai 100 lai thehchhuakin, Hazard-a man hian add-ons zawng zawng nen euro maktaduai 160 kai chho thei mah se, add-ons zawng zawng erawh Hazard hian a pha lo thunga, mahse a man an pek tawh zat hian euro maktaduai 110 a pel tawh thung.

Hazard hi Real Madrid player man to ber niin, an player zinga hlawh hnem ber a ni bawka, mahse hliamin a tlakbuak nasat em avangin Hazard hian season li leh a chanve chhungin Real tan hian game 73 bak a la khel lo.

Nikum September thla hnuah Hazard hian La Liga game a la khel leh lova, nikum October thla hnuah Champions League game a la khel leh lo bawka, Real atana a inlan hnuhnung ber hi kumin January thla ni 3 khan a ni a, fourth-tier club Cacereno lakah minute 67 a khel.

Hazard hi kum 2021 nipui lai atang khan Real Madrid hian chhuah tir an tum tawh a, hei hian kum 32 mi hi a ti lungawi lo nia sawi a ni a, Major League Soccer lam atangin dawrtu nei mah se, Hazard hian a hlawh tam tak kalsana kumina Real chhuahsan mai a la tum lo hle nia sawi a ni bawk.

Season kal mekah Hazard hian competition hrang hrangah Real tan hian minute 296 bak a la khel lova, goal khat khung tawhin assist vawi 1 a nei tawh bawk a, Real Madrid a zawm hnuah Los Blancos tan a thawhhlawk lo hle a ni.