Kai Havertz chu zai a ni dawn a, engtia rei nge a chawlh dawn tih erawn a sawi lawk theih lo.

August ni 22 khan Mikel Arteta chuan a forward Havertz chu uluk taka an endik tur thu leh, a lo kir leh hun tur a sawi lawk theih loh thu a sawi a nih kha.

Havertz-a khup hliam chungchangah Arteta chuan, "Havertz hi rilru paukhauh tak a ni a, a rilru put hmang a dik bawk a, hamstring hliam avanga zai a nih pawh khan rang takin a lo kir leh thei a nih kha.

"Khup hliam hi a la nei ngai lo a, a chawlh ve deuh chu a ngai dawn, rang taka lo kir leh turin duhsakna ka hlan e," tiin a sawi.

Hamstring hliam avang khan thla eng emaw zat season liamta khan a chawl a, February thlaa Dubai-a training an neihnaah khan a intipalh a nih kha. Season liamta tawp lam game hnih a rawn khel ve thei chauh.

Kum 2023 khan Chelsea aṭangin Havertz hian Arsenal a zawm a, Arsenal-a a season khatnaah khan league game 38 aṭangin vawi 37 a inlan. Kumin chu hliam avangin a chawl hnem zawk dawn ta a ni.

Gabriel Jesus pawh a inhliam mek a, hetih lai hian Arsenal chuan Sporting CP aṭangin Victor Gyokeres an lei, ani hi a inhliam lo a nih chuan Arsenal rinrawl a ni chho dawn.

Havertz a inhliam avang hian Mikel Arteta chuan forward dang a dap leh nghal zung zung a, Crystal Palace aṭangin Eberechi Eze chu £60million ($81.2m) bakah add-ons £7.5m-in an lei a, Arsenal squad hi a chhah ṭha angreng a, Havertz-a hliam hian a tibuai em em lo tura ngaih a ni.