FA Cup Third Round-a Manchester United an hneh loh hnuin Arsenal forward Kai Havertz-a nupui chuan Social media lamah beih a tawk.

Kum 25 mi German forward hian Emirates Stadium-ah khan chance ṭha lutuk vawi hnih a hlah a, vawi 5 shots nei mah se, goal zawnah vawi 1 chiah a pet. Tin, penalty shootout-ah a pet goal lo bawk a, Arsenal an chak loh phah.

Havertz-a nupui Sophia chuan social media lamah beih a tawk a, direct message-ah ṭawngkam na tak a dawng. Hemi chungchang hi Arsenal chuan a ngai thutak hle a, instagram lama ṭawngkam mawi lo taka beitute hi police nen an chhui zui mek a ni.

"Hetiang ṭawngkam mawi lo tak min rawn thawn hi a pawi lo niin in ngai elaw? Zak teh u, zak teh u. Sawi tur pawh ka hre lo, min zah ve hram teh u, in sawi ang em em hi kan ni lo a nia," tiin Sophia chuan instagram lamah a tarlang.

Metropolitan Police te chuan an chhui zui mek a, Arsenal pawhin Havertz-a nupui beitute hi chhui chhuah ngei an duh a ni.

Kum 2018 atang khan Havertz leh Sophia te hi an lo inzui tawh a, nikum khan an innei a, November thla khan fa an pai ve tih an puang.