Police te chuan tawngkam mawi lo taka Kai Havertz-a nupui lo tinawmnah tu chu an man.

FA Cup Third Round-a Manchester United an hneh loh hnuin Arsenal forward Kai Havertz-a nupui chuan Social media lamah beih a tawk a, hemi chungchang hi Police te chuan an chhui zui a, kum tling lo an man.

Hertfordshire Police chuan he thubuai chungchanga an man hi kum 17 mi, St Albans lam mi niin an sawi a, kum tling lo a nih avangin a hming tarlan a ni lo a, bail hmanga chhuah leh niin, chhui zui zel a ni dawn a ni.

Kum 25 mi German forward hian Emirates Stadium-ah khan chance ṭha lutuk vawi hnih a hlah a, vawi 5 shots nei mah se, goal zawnah vawi 1 chiah a pet. Tin, penalty shootout-ah a pet goal lo bawk a, Arsenal an chak loh phah.

"Hetiang ṭawngkam mawi lo tak min rawn thawn hi a pawi lo niin in ngai elaw? Zak teh u, zak teh u. Sawi tur pawh ka hre lo, min zah ve hram teh u, in sawi ang em em hi kan ni lo a nia," tiin Sophia chuan instagram lamah a tarlang a nih kha.

Kum 2018 atang khan Havertz leh Sophia te hi an lo inzui tawh a, nikum khan an innei a, November thla khan fa an pai ve tih an puang.