Harry Kane leh a naupan lai atanga a lo hmuhtaih tawh Katie Goodland te chu an inkutsuih ta.

England captain Harry Kane leh Katie Goodland te hian an inneihna hmun hi an puangzar duh lo a, Kane hian Twitter-ah an inneih thlalak hi a tarlang a, a hmun erawh a sawi tel lo thung.

Thlalak pakhatah chuan Kane hian jacket var a ha a, bow-tie dum a awrh bawk a, a nupui Katie chu a pawm a. Katie hian kawr fual a ha bawk a. Thlalak dangah Kane hian Katie chalah a fawp a, Katie chuan Kane-a jacket chu a khawih a, a zungbun thar chu a tilang a ni.

Kane chuan, “A tawpah chuan ka thian tha ber nen kan innei ta! Ka hmangaih che Katie Goodland,” tiin Twitter-ah a ziak a ni.

July 2017 ah khan an pahniha Barbados lama chawlh an hmannaah Harry Kane chuan Katie Goodland hi nupui atan a sawm a. An pahniha tuipui kama an len laiin Kane chu a thingthi a, Katie chu nupui atan hian a sawm a, Katie chu a hamhaih viau nghe nghe a ni.

A hma daihin Kane chuan an inneih hunah tah a tum loh thu sawiin, a, England in trophy an la a nih ngawt loh chuan tah mai mai a tum loh thu a sawi fiamthu tawh a ni.

“Ka thiannu hnenah hian England in trophy an la a nih chuan ka tah tur thu ka sawi thin a. Ani lahin kan inneih huna ka tah loh chuan inneihna tihtawp a tum thu a sawi thin,” tiin Kane chuan a sawi.

“Ka tap ngai lo hle a, ka tah hi a chhuak ve ngai mang lo a. Katie hian ka tap lai hi a la hmu miah lo ang,” a ti bawk.

Kane leh Katie te hian fa pahnih - Ivy Jane Kane leh Vivienne Jane Kane te an nei tawh a. England team-mate te chuan an inneih lawmpuina thu an thawn nasa hle.