Luis Suarez chuan kum 2010 WC-a Ghana an hmachhawn tuma a handball chunchangah ngaihdam a dil duh lo a, Ghana-in penalty an thelh pawh a thiam loh a ni loh thu a sawi.
Mual chhunga neuh neuh ngah ve em em Suarez hian kum 2010 World Cup-ah khan boruak a nei leh hat a nih kha. Quarter final-a Ghana nen an inhmachhawn tum khan a goal ngei ngei tur a lo hui thla.
Kum 2010-ah khan Ghana chu African lam team atanga World Cup quater-final inhlang kai thei hmasa ber niin, Africa-a World Cup a thlen tum a ni bawk. Africa khawmualpui tan rawn an hlawh nghe nghe.
1-1 a inhnehtawkin, extra time tawp lamah ball chuan Uruguay goalkeeper Fernando Muslera a thawlh pel tawh, mahse Suarez chuan a hnung atangin a kutin ball chu a lo dang. Khelmual atanga hnawhchhuah nghal a ni.
Ghana chuan chakna goal khung theihna hun tha an nei. Mahse Asamoah Gyan chuan penalty pet sualin goal ban a pet per. Penalty-ah goal khung tlem zawkin Uruguay an chak phah ta a nih kha.
Kha thil a thlen atang khan Suarez hian Ghana ram pum huat rawn a hlawh. Kha thil thlen atanga a vawi khatna atan Qatar World Cup Group H match hnuhnung berah Uruguay leh Ghana hi an inhmachhawn leh dawn. Round of 16 thleng turin an inbei thung dawn. Ghana hian point 3 nei sain, Uruguay hian point 1 chiah an la khawl thung.
inkhelh hmaa chanchinbu mite hmaa a inlan tumin Suarez chuan kha handball chungchangah khan ngaihdam dil a tum loh thu a sawi. African lam an tlawmna kha ama thiam loh ni lovin Gyan-a thiam loh a nih thu a sawi.
"Kha thil chungchangah khan ngaihdam ka dil dawn lo. Ka handball ngei a, mahse Ghana khan penalty an thelh a, keimah vang a ni lo. Player thenkhat tihliam palh ni ila chu ngaihdam ka dil ngei ang.
"Red card ka hmu a, Referee khan penalty a pe a, ka thiam loh a ni tawh lo. Penalty kha keima thelh a ni lo. Ka thiam lohna a awm lo a ni." tiin chanchinbu mite hmaah Suarez chuan a sawi.