Erling Haaland chuan hun rei tak Manchester City-a cham turin contract thar a ziak a, a career hun tam zawk chu Etihad Stadium-ah hian a hmang dawn ta a ni.

Tuna Haaland-a contract hi kum 2027 June thlaah a zo dawn a, Norway striker hian kum 9 leh a chanve atan Etihad Stadium-ah contract thar a ziak a, kum 2034 thleng atan contract a ziak.

City-a a contract a hman zawh meuh chuan Haaland hi kum 34 a ni tawh dawn. A hlawh zat tur hi puan chian a ni lo a, Premier League-a hlawh tam ber pakhat a ni ngei dawn niin The Athletic chuan a tarlang.

Kum 24 mi hi Real Madrid nen sawi zawm an ni thin a, mahse Manchester-ah hian a hlim a, Premier League Champions tana khelh chhunzawm zel a thlang ta a ni.

Kum 2022 khan Borussia Dortmund atangin City chuan Haaland hi €60million-in an lei a, English club tan hian game 126 khel tawhin, goal 111 a khung tawh a, Premier League no mawi vawi 2 a chawi tawh a, FA Cup, Champions League leh Super Cup te a chawi tawh bawk.

Pep Guardiola nen an inhrawn reng dawn em tih erawh a hriat loh. Spanish coach hian nikum November thla khan kum 2027 thleng atan contract thar a ziak a, Pep hian hei bak chu Etihad Stadium-ah hun a hmang tawh lo maithei a ni.