Rei tak an indawr hnuah Arsenal chuan Viktor Gyokeres an la lut fel ta a, a manah 73m euros (£64m) vel an seng a, kum 5 chhung atan Emirates Stadium-ah contract a ziak.

Nikum November thla khan Champions League Group Stage match-ah Arsenal leh Sporting CP te an inhmachhawn a, Arsenal khan 5-1 in hnehna an chang a nih kha. Kha avang khan Gyokeres hian Arsenal pan a chak thu a sawi chhuak.

"Ka khelhna tur tak ka pan niin ka inhria. Mikel leh Sporting Director Andrea Berta te khan min rawn bia a, kum liamta lama an khelh dan te ka thlir kir a, an football khelh dan kha ka ngaihnat zawng a ni.

"Season liamta khan Arsenal ka hmachhawn a, hmachhawn an hautak hle a nih kha.Kha kha Arsenal ka pan chhan chu a ni. Tin, history ropui tak an nei a, fans tha tak tak an nei bawk a ni," tiin Viktor Gyokeres chuan Arsenal a zawm hlimin a sawi.

Tun nipui bazarah hian Arsenal chuan player thar lei nan £204m an hmang tawh a, Martin Zubimendi, Kepa Arrizabalaga, Christian Norgaard, Noni Madueke leh Cristhian Mosquera te an lo la lut tawh bawk a ni.

Arsenal boss Mikel Arteta chuan, "Viktor hian thiamna leh theihna tam tak a nei. A rang em em a, club leh ram tan goal a khung thei em em bawk.

"Kan goal chance te ani hian a lo khung malh malh thei dawn a, goal hmaah a hriam em em a, box chhungah a hlauhawm em em bawk.

"Viktor kan la thei hi kan phur a, ani hoa hnathawh ho vat vat kan nghakhlel a ni," tiin a sawi.