Chelsea chuan Inrinni tlai khan Premier League inkhelah an thenawm Fulham an lo mikhual a, Stamford Bridge-ah Chelsea hian si khat faiin hnehna pawimawh tak an chang.

He inkhela goal awmchhun hi Cole Palmer-a’n penalty spot atanga a thun a ni a, Chelsea hian point 3 hlu tak hlawhchhuakin, Premier League table-ah pariatnaah an chho.

Half time hma lawkin Fulham player Issa Diop chuan Chelsea forward Raheem Sterling chu box chhungah a titlu a, Chelsea hian penalty hlawhchhuakin, Palmer-a’n goal ah a chan tir leh a, hei hi tun season-a penalty spot atanga goal a khung vawi ngana a ni.

Goal an khung hnuah Chelsea an khel tha zual a, mahse goal hmaah an hriam lo chhunzawm hle a, goal khung belh thei an nih laiin chance eng emaw zat an bawhpelh leh. Fulham pawh an khel chhe lova, chance tha tak tak pawh nei mah se Chelsea goalkeeper Djordje Petrovic an paltlang thei lo.

Fulham manager Marco Silva a lawm lova, Chelsea defender Malo Gusto chu red card hmu ngei tura a ngaih thu a sawi. First half-ah Gusto hian Willian chu a boot hling lamin a tlawh a, referee Anthony Taylor chuan Gusto hi yellow card pe in, VAR lamin an endik hnuah referee thutlukna hi an thlak lo.

Silva chuan, “Red card tur chiang tak a ni a, Anthony Taylor-a tan khan red card a nih leh nih loh hmuh a harsa. A mah khan thiam lohna a nei lova, a chhan chu thil thlen dan kha a rang em em a ni. Premier League-ah hi chuan khatiang thil thleng kha vawi 10 awm ta se, vawi 9 ah red card phawrh a ni ang,” tiin a sawi.

Chelsea hian khelh 21 atangin point 31 an hlawhchhuak tawha, pariatnaah awmin, Fulham hi 13-naah an awm chhunzawm a, Fulham hian khelh 21 atangin point 24 an hlawhchhuak tawh a ni.