Manchester City boss Pep Guardiola chuan nipui bazar liamtaa player thar a lei lo kha a tihsual a nih thu a pha lo.

Tun thlasik bazarah hian City chuan player thar an dap kual mek a, Lens defender Abdukodir Khusanov chu £33.6m velin an la dawn a, inremna pawh an nei fel tawh.

Eintracht Frankfurt forward Omar Marmoush pawh City hian lak an inbeisei hle a, Palmeiras rawlthar Vitor Reis pawh player nen chuan inremna an nei tawh a, mahse sawi chian theih a la awm lo.

Hetih mek lai hian an full-back Kyle Walker chuan chona thar hmachhawn a, ram dang club zawm a duh thu a lo sawi ve mek a, ani hian thlasik bazarah hian City a chhuahsan a rinawm hle.

Man City boss Pep Guardiola chuan, "Nipui bazar liamtaah khan club hotute chuan player thar lei an duh a, kei khan a ngaih loh thuin ka chhang.

"Ka player neih sa te hi ka ring tawk em em a, hna ropui tak an thawh theih leh ka ring. Mahse hliam kan ngah tak hnuah kha chuan, nipui bazara player ka lei lo kha ka tihsual a ni tih ka hria," tiin a sawi.

City hi Premier League-ah 6-na an ni mek a, EFL Cup atanga thehchhuah an ni a, Champions League table-ah pawh 22-na an ni mek.

City hian kar hnih emaw a aia tam emaw inhliam player 15 an nei mek. Ballon d'Or winner Rodri phei chu tun season chhung a inkhel thei dawn lo.

"Tun season ṭantir khan ka player eng emaw zat chuan kum 30 an pel dawn tih kan hre lawk. 

"Chutih laiin thla 6 liamta kha chuan a zawna a vawi 4 nan Premier League kan chawi a, FA Cup final kan lut a, Champions League quarter-final kan lut bawk. 

"Chutih laiin player inhliam kan nei hnem lutuk a, ka rin phak bak a ni," tiin Pep Guardiola chuan a sawi bawk.