Tottenham leh Real Madrid star hlui Gareth Bale chuan tla leha PGA golf tournament awm turah a tel tur thu a sawichhuak a, prize fund hi $9m a ni.

Bale hian football career a zawh chhung zawngin golf a ngainat zia hi hriat theih a ni a, Real Madrid-a a awmlai khan hai lan a ni bawk. Los Blancos-a khelh aiin golf khelh a duh zawk tih thu chu fiamthu nana hman a ni a, mahse Spanish capital fan-te chuan a nuihzatthlakna an hre ve lo.

Vawi 5 Champions League lo champion tawh hi,'Wales. Golf. Madrid. In that order',tih inziahna flag nen a lo inlan tawh bawk. 

Kum 33 mi hian football a chawlhsan hnuah eng nge a tih chhunzawn ang? tih chu zawhna lian tak a ni a, hobby anga rei tak a lo neih tawh golf lamah ke a pen dawn niin a lang. 

2023 AT&T Pebble Beach Pro-Am California-ah a inlan dawn tih a tichiang tawh a, professional player 156 leh tui vanga khel mai mai 156-te inelna tur a ni. Milar Billy Murray leh Jason Bateman-te pawh an tel dawn. 

Footballer chawl tawh golf lama an inleh vawikhatna a ni lo a, West Ham leh Liverpool defender hlui Julian Dicks pawh a lo inlet tawh. 

Mahse a football chawlhsanna chhan a khupa harsatna vang thoin golf pawh a chawlsan leh. Manchester United winger hlui Lee Sharpe pawh professional golfer-ah a lo inlet tawh bawk a ni.