Pathianni tlai khan North London Derby khelh a ni a, Arsenal leh Tottenham te chu 2-2 in an inhnehtawk.
Romero chuan an lamah a ti goal a, Saka chuan penalty atangin Arsenal tan goal a khung. Spurs tan Son chuan goal hnih a khung bawk.
Hmahruaitu Manchester City lakah Arsenal hi point 4-in an hnufual mek a, mid-week hian Carabao Cup-ah Brentford an hmachhawn ang a, kar tawp Premier League match-ah Bournemouth an hmachhawn leh dawn a ni.
Emirates Stadium-a Spurs nen an inhnehtawk hnuin Arsenal boss Mikel Arteta chuan, "Point hlu tak point 2 hloh angah kan inngai, goal ho lutukin vawi hnih kan chhuah. Mahse tihsual hi chu football-in a ken tel a ni ve reng a," tiin a sawi.
Nipui bazara man to taka an lei Declan Rice chu la chhuakin Arteta hian Jorginho a dah lut, Italian midfielder chuan tihsual a nei chhunzawm a, Son-a goal a khilai a ni ber mai.
"Rice khan hnungzang na a nei a, inkhelh chhung khan a nuam sam lo tih a lang, ka la chhuak ta a ni. A dinhmun hi kan enfiah ang, ani ang lak chhuah kha chu a mak ve alawm," tiin Arteta chuan a sawi.
Jurrien Timber chuan khup hliam avangin hun rei tak Arsenal tan a inlan thei dawn lo. Thomas Partey pawh a inhliam a, Trossard leh Martinelli te pawh an inhliam a, Rice pawh Spurs an hmachhawn tumin an inhliam.
"Vawiin khan player pawimawh 5 lai inhliam avanga chhawr theih loh kan nei. Tu tan pawh hun tha tak a awm zel dawn bawk e. Hetih lai hian game tin mai hian inhliam hi kan nei chho ta," tiin Arteta chuan player hliam an ngah chhoh thu a sawi chhuak bawk.
Tottenham boss Ange Postecoglou chuan Korean forward Heung-Min Son a fak hle. "A chungah ka lawm khawp mai, Arsenal kha team tha an ni a, Emirates Stadium-a len luh hi a hautak khawp mai.
"Ka player ten an theihna an lantir a, an huaisenna kan hmu e. Chak duhna thinlung an pu a ni," tiin a sawi.
Ben White-a shot chu Romero chuan a kutin a lo dang, referee-in VAR hmanga an ennawn hnuah penalty ham a ni a, Saka chuan Arsenal goal hnihna khung nan a hmang.
"Kan tan a tha lamin thil a kal lo a, vanduaithlak takin own goal kan nei a, penalty kan chawi bawk.
"Handball Penalty chungchang hi sawifiah a ngaiin ka hria. Handball rules hi ka hrethiam ta bik lo, a chang leh mak takin penalty an pe a, a chang leh pekna awm nia kan hriatah an pe lo bawk a," tiin Romero handball chungchang Postecoglou chuan a sawi.