Germany vung takin kan kal dawn: Kimmich

23rd November 2022, 02:11PM

Germany chuan tun hmaa an chetsualna aṭanga insiam ṭhat a, kumin World Cup chu a bul ṭan phat aṭanga vung taka kal an tum thu an midfielder Joshua Kimmich chuan a sawi.

World Cup 2014 Champion Germany hian 2018 World Cup leh 2020 Euro-ah te beisei angin an thleng sang thei lo, an match hmasa berah an chak lo ve ve nghe nghe. Chuvang chuan Germany hian khang hunlaia an chet a phetna te hre rengin beiseina sang tak nen Qatar hi an pan a ni.

Germany hian zanin dar 6:30 ah Group F-a an match hmasa ber Japan nen an khel ang.

Guillem Balague-a’n BBC Radio 5 Live-a an inkawmnaah ti hian Kimmich chuan a sawi, “Kan match hmasa bera kan chak loh leh chuan kan chungah pressure a sang dawn em em a, chuvang chuan kan chetsualna angah khan chetsual nawn leh kan tum tawh lo.”

“Kan inzir nasa a; inlak len ringawt te, player ropui neih tam te, tun hmaa kan lo hlawhtlin tawhna te leh nomawi engzat nge kan chawi tawh tih lam hi a pawimawh ber a ni loa.”

“Team ṭha, thawhhona ṭha leh inlungrual em em neih hi a pawimawh ber zawk chu a ni. Team ṭha tak neih kan tum tur a ni, team ṭha nei turin khawvela player ṭha kawl kher a ngai hran lo,” tiin khawvela defensive-midfielder ṭha ber pawla ngaih chuan a sawi.

Kum 27 a upa Kimmich hi Germany tan World Cup vawi hnih a inlanna tur a ni a, World Cup a khelh hmasak ber kum li liam ta ah khan Germany hi an che chhia, Champion lai ni mah se group stage an paltlang zo lo, an match hmasa berah Mexico lakah an tlawm bawk a ni.

Bayern Munich midfielder Kimmich hian ram tan vawi 71 a inlan tawh a, goal 5 a thun tawh.

World Cup champion ṭum 4 lo ni tawh Germany hi Fifa ranking-ah 11-naah an awm a. Zanina group stage-a Japan an hmachhawn zawh hnuah hian Spain leh Costa Rica te an la hmabak a ni.

 

Copyright © inkhel.com 2022. All rights reserved.