Germany head coach Hansi Flick thlak turin Jurgen Klopp chu rin kai ber zing ami a ni mek.

Kai Havertz, Serge Gnabry leh Niclas Fullkrug te goal hmangin Costa Rica hneh mah se Japan comeback ropui tak avangin Germany chuan Round of 16 an lut thei ta lo a nih kha.

A zawnin World Cup Group Stage an paltlang zo ta lo, sawiselna tam tak piang nghalin, an coach Flick hian a dinhmun hi a chhuahsan nghal dawn em? tih zawhna pawh tam tak a awm mek.

Germany tana lo fehchhuak tawh thin Dietmar Hamann chu Flick chhuah huna a dinhmun luah tura koh a ni a, Liverpool coach Jurgen Klopp leh Chelsea coach hlui Thomas Tuchel pawh Flick thlak tura rin kai an ni.

Nimahsela, Klopp-a agent Marc Kosicke chuan, "Chanchinbu mite thu vawrh darh mai mai a ni E. Jurgen hian Liverpool-ah 2026 thleng contract a nei a, chu chu puitlin a tum, " tiin he dinhmun hi an ngaihven lem loh thu a sawi.

Flick hian nikum khan Germany-ah kum 3 daih contract  ziakin, Germany-a khelh tur EURO 2024 thleng daih a ni a, hetih lai hian kumin World Cup-a an chet ropui loh tak em avangin a dinhmun hi a chiang ta lo hle.

Germany head coach dinhmun a chhuahsan dawn leh dawn loh zawhna tam tak awm chu chhangin Flick chuan, "Kan tifel thuai ang. Kan tla fel chauh a ni a, tunah chuan chhan mai a la harsa. Nakinah kan hre mai ang," tiin chanchinbumite a chhang.