Ningani zanlai khan FIFA World Cup khelh mekah Group E an inchingfel a, Group E atang hian Japan leh Spain te chuan Round of 16 an lut a, Germany leh Costa Rica te an tla thung.
Germany hian 4-2 in Costa Rica an hneh a, mahse inkhel lehlamah Japan in Spain an hneh ve thung avangin Germany hi Round of 16 khel turin an inpet kai zo lo.
Spain goal difference hi a that em avangin Germany tan hian 4-2 a Costa Rica hneh a tawk lova, Spain leh Japan te an inhnehtawk emaw, Spain hi chak zawk emaw se chuan, Germany hian point khata Japan lehpelin knock out stage an lut thei a, mahse Spain hian Japan hi an hneh ta lo a ni.
Kum 2018 World Cup ah pawh khan Germany hi group stage ah an lo tla tawh a, World Cup nomawi vawi li chawi tawh Germany hi a zawnin group stage ah an tla tihna ni.
Costa Rica lakah hian Germany tan Kai Havertz chuan goal hnih a khung bakah Serge Gnabry leh Nicolas Fullkrug te chuan goal khat ve ve an khung a, Costa Rica tan hian Yeltsin Tejeda chuan goal a khung a, Germany goalkeeper Manuel Neuer a own goal bawk.
Germany hian tan atanga minute sawm hnuah goal an khung a, veilam atanga Raum-a ball cross chu Gnabry chuan nalh takin goal ah a lo tauh lut a, si khat faiin Germany hian hma an hruai.
Darkar khat an khelh tlin hma lawkin Costa Rica in an si phurh an sut a, Waston-a ball tauh Neuer-a lo save per chu Tejeda chuan goal ah a thun a, 1-1 a ni. 70mins ah Costa Rica hian buai nuai nuai karah goal an khung leh a, 2-1 in Costa Rica in hma an hruai a, a tirah Costa Rica goal hnihna hi Vargas-a goal anga kal tir ni mah se, a hnuah Neuer-a own goal anga thlak leh a ni.
Germany hian minute thum hnuah an si phurh an rul nghal a, Fullkrug-a pass chu Havertz chuan hnai set sawt atangin goal ah a lo thun. 80mins hnuah Havertz leh Fullkurg te chuan goat ve ve khung lehin, 4-2 in Germany hian hnehna chang mah se, Costa Rica nen World Cup an mangtha a ngai ta tho a ni.
Group E inkhel dangah rin loh zawk Japan in Spain an hneh a, Japan hian Group E leader niin group stage an khar a, pahnihnaah Spain an awm thung. Round of 16 ah Japan hian Croatia an hmachhawn dawn a, Spain hian Morocco an hmachhawn ve thung ang.
Spain hian Alvaro Morata goal hmangin hma hruai hmasa mah se, Japan hian Ritsu Doan leh Ao Tanaka te goal hmangin La Roja hi an lehthal a, point 3 hlu em em an hlawhchhuak.
Tan phat atangin Spain hian ball chang hnemin inkhel an thunun nghal a, goal pawh an khung har lo. Minute sawm chuang awrh an khelhin hma an hruai a, Morata chuan Cesar Azpilicueta cross chu chiang takin goal ah a lo tauh lut.
Half time zawh rualin Japan head coach Hajime Moriyasu chuan Doan leh Kaoru Mitoma te a dah lut a, anni pahnih hian game an rawn thlak hle a, Japan goal hnihah an inrawlh ve ve.
Second half an tan hnu lawkah Japan in an si phurh an sut a, Spain goalkeeper Unai Simon a ball pet chhuak dik lob hmang tangkaiin Doan chuan yard 25 vela hla atangin goal a khung a, 1-1 a ni. Minute nga hnuah Japan in an goal hnihna an thun a, Japan goal luh hma hian ball a out hman niin lang zet mah se, VAR a uluk taka an en hnuah goal hi pawm a ni a, 2-1 in Japan hi an chak ta a ni.