German ral lian in Japan ral lian an ngam lo

23rd November 2022, 09:11PM

Qatar World Cup Group E inkhelah Germany leh Japan te chu Khalifa International Stadium ah an inhmachhawn a, 2-1 in rin loh zawk Japan in hnehna an chang.

Japan tan hian Ritsu Doan leh Takumi Asano te chuan goal an khung a, Germany goal neih chhun hi Ilkay Gundogan-a’n penalty spot atanga a thun a ni.

Germany hian first half ah hma an hruai a, vawi eng emaw zat goal khung belh theihna hun an neih an bawhpelh an tuar tih theih a ni a, chutih rual chuan Japan goalkeeper Shuichi Gonda a che tha hle.

Japan hian bul an tan chhe lova, tan atanga minute sawm pawh a ral hmain Junya Ito ball pek tha tak chu Daizen Maeda chuan goal-ah a lo thun a, mahse offside avangin goal hi pawm a ni lo.

Germany hian bul tan tha nghal vut lo mah se, game-ah an insiamrem telh telh a, inkhel an thunun chho zel a, Gundogan chuan chance tha tak pawh nei zuiin, mahse Manchester City midfielder hian a chance tha a hlah.

Gundogan-a’n chance a hlah hnu lawkah Gonda chuan box chhungah David Raum a titlu a, Germany hian penalty hlawhchhuakin, Gundogan chuan goal-ah a chan tir a, 33mins-ah Germany in si khat faiin hma an hruai.

Half time hma lawkin Kai Havertz chuan Germany goal hnihna a khung emaw a ti a, mahse Chelsea forward hi chiang taka a offside a vangin a goal thun hi chhiar a ni lova, 1-0 in first half tihtawp a ni.

Germany hian an chance neih tam tak chu goal-ah an chan tir thei lova, si khat faia hma an hruai reng hnuah, Japan lamin 75mins-ah an si phurh an sut. Germany goalkeeper Manuel Neuer chuan Takumi Minamino shot tha takin a save per a, mahse a ball ben per chu Doan-a lamah kalin, Doan hian goal ah a thun a, Japan si phur sutin 1-1 a ni.

Minute sawm pawh a ral leh hmain Japan in hma an hruai a, angle zim tak atangin Asano chuan Japan chakna goal a khung a, 2-1 in Japan hian World Cup nomawi vawi li chawi tawh Germany an lehthal ta a ni.

Copyright © inkhel.com 2022. All rights reserved.