UFC president Dana White chuan Georges St-Pierre chu inbeih lampang ngaihven loa puhin, a chawl tawh tih a sawi.

Canadian fighter GSP hi ril lawng vangin harsatna neuh neuhin a tlakbuak ve reng a, ril ulcer hian a pawt hniam a, nikum December thla khan middleweight title pawh a kalsan phah hial a. Nikum November thlaah UFC middleweight champion Michael Bisping nen an inbei a, round 3-naah GSP hian submission hmangin Bisping chu a hneh a, UFC 217 ah weight pahnih champion a ni.

Bisping a hneh atanga thla khat hnuah chuan UFC khawvelah hmuh tur a awm zui lo a. Bisping nen an inhmachhawn bak hi chu Octagon a luhchilh leh ta miah lo a, hei vang hian Dana White chuan GSP chawlh tawh thu hi a puang ta a ni.

Dana White chuan GSP hi fight nei tura tih a tum thin nia sawiin, kum 37-a upa hian inbeih lampang a ngaihtuah lo niin a sawi a. “Kan hriat theih chinah GSP hian inbeih hi a ngaihven lo a, a ngaihsak lo em em bawk a. Heti a nih chuan GSP hi a chawl tawh tihna a ni a, tumah hmachhawn a tum tawh lo,” a ti.

White hian Los Angeles khawpuia Nate Diaz leh St-Pierre te inbeihtir tumin hma a la a, mahse GSP hian eng vaka a ngaih loh avangin an puitlin ta lo a. A hmachhawn tur hian lar ve deuh chhawpsak an tum pawhin aw a pawh tha duh lo a ni.

Georges St-Pierre hi UFC welterweight champion zingah ropui bera sawi a ni a, tun hnuah fight a nei tlem ta viau mai a. 2013 khan UFC 167 ah a tel a, Johny Hendricks a hneh a, hemi hnu hian kum 4 zet a reh a. Nikum November thlaah Bisping hmachhawn turin a inlar leh a, a reh leh ta vang vang a ni.