Inhliam avanga thla 10 lai a chawlh hnuah Gavi chuan training a zawm leh ta e.

Nikum November thla khan Euro qualifier match-ah Gavi hian a khup dinglam a tihliam a, 2023-24 season pumpui deuhthaw a chawl a, Euro 2024-a Spain an champion tum pawhin a tel ve thei ta lo a nih kha.

Nilaini khan Gavi chuan Barcelona team training a zawm ve leh ta a, Barca tan a hun takah a lo kir leh thei dawn niin a lang mek. Frenkie de Jong a inhliam mek a, kerek hlia avangin April thla atang khan a la chawl.

Kum 17 mi Marc Bernal pawhin ACL injury avangin zai a tawk a, ani pawh thla 12 emaw vel a chawlh a ngai dawn a, kum 21 mi Fermin Lopez pawh hamstring hliam avangin kar 3 a chawlh a ngai dawn.

Gavi hi La Masia chhuak a ni a, naupang te ni chungin Barcelona first team-ah a inlan. Spanish club tan hian game 111 lai a khel tawh a, goal 7 khung tawhin, assist vawi 14 a nei tawh bawk a, La Liga leh Spanish Super Cup te a chawi tawh a ni.

Tun season La Liga-ah Barcelona hian bul an tan tha hle, an game hmasa 4-ah hnehna an chang vek a, an hmelma Real Madrid chu point 4-in an tlansan mek. Tun Pathianni hian Girona an hmachhawn dawn a ni.