Chelsea chuan Alejandro Garnacho lak tumin Manchester United an dawr tan ta niin David Ornstein chuan a tarlang a, indawrna pawh a kal tluan a beiseiawm.

Chelsea hian a hmain Garnacho hi a mimalin an lo dawr tawh a, Argentine winger hian Chelsea pan a duh ve hle a, hei vang hian club dang amah duhtute pawh a hnar nia report a ni.

Kum 21 mi Garnacho hi tun nipui bazara Manchester United-in hralh an tum 5 zingah a tel a, kumin May thla khan Ruben Amorim chuan Garnacho hi club dang zawng turin a lo hrilh tawh nghe nghe a nih kha.

Manchester United chuan RB Leipzig atangin Benjamin Sesko an lei thei dawn a, Ningani khan club pahnih te hi €76.5million (£66.4m; $89.1m) bakah add-ons €8.5m-in an inrem. Hei vang hian United pawh hian an player hralh tura an chhawpchhuah te chungchang pawh an buaipui nghal char char a ni.

January transfer window inhawn lei khan Napoli pawhin Garnacho hi an lo ngaihven tawh a, mahse Italian dawrna kha United lamin an lo hnar. United hian Garnacho manah £70million an chhiar a, mahse tunah chuan £50million vel an chhiar ta nia report a ni.

Europa League Final-a Tottenham an hneh loh tum khan, inkhelhna hmun a chan tlem em avangin Garnacho a lungawi lo a, social media lamah a lawm loh thu a sawi vak a nih kha. 

Kha avang khan Amorim chuan player dangte awm laiin Garnacho chu club dang zawng turin a hrilh a, khata tang khan an inkar hi a tha lem lo chho ta char char a, tunah chuan Stamford Bridge lamah Argentine winger hi a inpuchhuak dawn ta niin a lang.

Season liamta khan Garnacho hian comepetition hrang hrangah United tan game 58 a khel a, goal 11 khungin assist vawi 10 a nei. Garnacho hi United chuan kum 2020 October thla khan Atletico Madrid Academy atangin an la chhuak a, United senior team tan game 144 a khel a, goal 26 a khung a ni.