Manchester United manager Erik ten Hag chuan Arsenal lakah Alejandro Garnacho-a goal thun, offside an ham sak tak chu offside tur a nih loh thu a sawi.

Sunday zan khan Manchester United hian Emirates Stadium-ah season hmasa a pahnihna Arsenal an tlawh a, 1-1 a nih reng hnuah, mual neitu lam Arsenal hi 3-1 in an chak.

Arsenal tan hian an captain Martin Odegaard chuan goal a khung bakah, Declan Rice leh Gabriel Jesus te pawhin goal an thun a, United goal neihchhun hi Marcus Rashford-a thun a ni.

Mikhual lam United hian hma an hruai hmasa a, 27mins-ah Rashford chuan United hi hma hruaipui mah se, minute khat hnuah Odegaard chuan Arsenal si phurh a rul. 90mins ah pawh 1-1 a la ni a, mahse injury time-ah Arsenal hian goal hnih thun lehin, point 3 an hlawhchhuak.

Si khat ve ve an inpek hnuah Garnacho chuan United tan goal khung mah se, VAR lama endik a nih hnuah Garnacho hi a offside chiah chiah avangin a goal hi pawm a ni lova, Arsenal forward Kai Havertz-a penalty hlawhchhuah pawh VAR lama en a nih hnuah sut leh a ni bawk.

Inkhelh zawhah Ten Hag chuan, “Kan khel chhe hran lova, kan khel tha thawkhat viauin ka hre zawk a, mahse engkim mai kha kan duh dan nilo zawngin a kal a ni ber a, kan chak lo zui bawk. Chak tur chuan kha aia kan vanneih hret a ngai a, Garnacho kha a offside lova, an enna angle dik loh vang a ni.

“Rasmus Hojlund khan penalty hlawhchhuak tur a ni bawk a, Jonny Evans laka an foul laiin goal kan chhuah bawk a, kha chu chiang takin a lang a ni. Kan chance neih te goal-a kan chan tir a ngai a, si khat faia hma kan hruai hnuah chuan goal chhuah tur kan ni lo bawk. Heng te hi thudik a ni a, mahse kan khelh danah khan ka lawm a ni,” tiin a sawi.