Alejandro Garnacho chungchangah Italian club Napoli chuan Manchester United an dawr tawh a, indawrna hi an chhunzawm zel dawn niin Sky Sports chuan a tarlang.

Garnacho hi Chelsea lam pawhin an ngaihven a, mahse Argentine forward hian Italy lama kal a pawiti lem lo niin media te chuan an tarlang mek.

Academy chhuak player an hralh thei a nih chuan, Manchester United hian bazarna tur sum an nei nual thei dawn a, hetih lai hian kum 20 mi hian Old Trafford a chhuahsan dawn em tih erawh sawi chian theih a la ni lo thung.

Garnacho hian Ruben Amorim-a hnuaia khelh nuam a ti niin a lang a, Amorim-a khelhpui danah nasa takin a insiam rem tih a lang. Hetih lai hian Napoli lamin sum tam tak senga an dawr a nih erawh chuan, Garnacho hian Old Trafford a chhuahsan mai pawh a rinawm hle.

Kar hmasa Europa League-a Rangers an hneh tum khan Garnacho chuan Old Trafford-a a match hnuhnung ber tur niin a ngai niin media te chuan an tarlang. 

Inkhelh zawhah Garnacho chuan a hming lama au rual United supporter te chu a vai liam a, mi tam tak chuan United a chhuahsan dawn niin an ngai.

Academy chhuak player te hralh hi a hlawk a, PSR rules-in a phuar tak hnu hi chuan, academy chhuak player te hralh hian, player thar lak luhna tur kawng zau takin a hawn sak thei ṭhin. Hei vang hian United chuan Garnacho hi hralh an pawiti lem lo nia report a ni mek. Hetih lai hian United supporter te chuan Garnacho hi an ngaina em em.

Ruben Amorim ngei pawhin Garnacho hma hun chungchang a sawi chian theih loh thu a lo sawi tawh bawk a nih kha. Hetih lai hian Napoli leh United te chu Garnacho man chungchangah an inrem hlethei lo niin Sky Sports chuan a tarlang.

United chuan Garnacho hi €65M vel an chhiar nia tarlan a ni a, Napoli lam hian €55M bak chu tawlh an tum bik lo niin Sky SPorts chuan a tarlang. Transfer window khar a ni tep tawh, tun kar chhung hian ngawrh zawka an indawr chhoh a rinawm.