Ningani zan khan Manchester United chuan 2-1 in Rangers an hneh a, Europa League last 16-ah an insawhnghet mek, hetih lai hian fans lam ngainat Alejandro Garnacho chuan Old Trafford a mangṭha ta niin a lang.
Inkhelh zawhah Ruben Amorim pawhin Garnacho hma hun chungchang a sawi lawk theih loh thu a sawi a, a chhuak a nih chuan Ningani zana Rangers an hmachhawnna match kha, Garnacho-a tan chuan Old Trafford-a United player ni chunga a game hnuhnung ber a ni tawh ang.
Rangers an hmachhawn ṭum hian Garnacho chuan minute 90 chhung a khel a, goal pawh a khung teuh hle. Rangers goalkeeper Butland chuan ṭha zetin vawi hnih a dang.
Matthijs de Ligt-a tauh goal chu referee chuan foul hamin a pawm sak lo a, second half-ah Eriksen-a corner pet aṭangin United chuan goal an khung. Eriksen-a corner pet hi Rangers goalkeeper Butland chuan mak takin anmahni lamah a chum goal.
Hun tawp dawn tak tak minute 88-ah Dessers chuan mawi lutukin ball a dawng a, United goal bottom corner-ah a chhuih lut, team hnih te 1-1 in an inhnehtawk dawn emaw tih hnu 90+2 minute-ah captain Bruno Fernandes chuan United chakna goal a khung.
Mual veilam sir aṭanga Lisandro Martinez-a cross ṭha lutuk chu Fernandes chuan box chhunga tlan luh pahin a volley, goalkeeper kap karah lutin, hei hi United chuan an chakpui ta a ni.
Inkhelh zawhah Garnacho chuan a hming lama au rual United supporter te chu a vai liam a, mi tam tak chuan United a chhuahsan dawn niin an ngai. Garnacho hi Napoli leh Chelsea te chuan an ngaihven reng a, United chuan £60m vel an chhiar nia report a ni.
Academy chhuak player te hralh hi a hlawk a, PSR rules-in a phuar tak hnu hi chuan, academy chhuak player te hralh hian, player thar lak luhna tur kawng zau takin a hawn sak thei ṭhin. Hei vang hian United chuan Garnacho hi hralh an pawiti lem lo nia report a ni mek. Hetih lai hian United supporter te chuan Garnacho hi an ngaina em em.
January transfer window hi February ni 3-ah khar a ni dawn a, hemi hma chiah hian United chuan Old Trafford-ah Crystal Palace an mikhual dawn. Garnacho hi a chhuak a nih chuan, Palace hi a hmachhawn hman a rinawm loh a, hei vang hian Rangers an hmachhawnna match kha Old Trafford-a Garnacho hun hnuhnung niin mi tam tak chuan an ngai ta a ni.
Garnacho, Rashford, Antony leh Tyrell Malacia te chu United-in an chhuahtir dawn niin thu a thang mek. Hemi chungchang hi Ruben Amorim zawh a ni a, United boss chuan, "Ka player te an la ni a, manager dang player an la ni lo.
"Kan club dinhmun in hria a, kan tana ṭha tur ber thil kan ngaihtuah mek a ni. In mi zawhna chu ka hrethiam alawm, tun dinhmunah chuan ka player te an la ni a, kan khelh leh hmasak ber tur chungchang chiah ka ngaihtuah.
"Eng nge thleng dawn ka sawi thei lo, transfer window khar a nih hma chu thleng thei lo hi a awm lo a ni," tiin a chhang.
Garnacho chungchang zawh a ni leh a, Ruben Amorim chuan, "Lo ngaichang rawh u, Manchester United player a ni mek a, vawiin pawh khan kan tan a ṭangkai em em a ni.
"Ka khelhpui danah nasa takin hma a sawn, vawiinah pawh khan a chhung lama a luh leh pawn lama a chhuah khan a ṭangkai em em a ni. Player hmasawn tak a ni e," tiin a chhang.
Kum 2020 khan Garnacho hian Atletico Madrid aṭangin Manchester United a pan a, kum 2022 khan United tana a debut game khelhin, English club tan hian game 118 a khel tawh a, goal 23 a khung tawh bawk.
Tun season competition hrang hrangah game 32 a khel tawh a, goal 8 a khung tling tawh bawk a ni.