Turkish club Galatasaray chuan Thawhtanni zan khan Lucas Torreira leh Dries Mertens te an lakluh thu an puang. Galatasaray hian Torreira hi Arsenal atangin an lei chhuak a, Mertens erawh free agent a nih angin free transfer-in an lalut a ni.

Torreira man atan Galatasaray hian euro maktaduai 6 an seng niin chanchinbu mi te chuan an tarlang a, 26 mi hi kum li daih contract an ziahpui.

Uruguayan midfielder hian kum 2018 khan Sampdoria atangin Arsenal a pan a, mahse Arsenal-ah hian beisei a pha lo. Arsenal hian Atletico Madrid leh Fiorentina-ah te loan-a an tirh chhuah hnuah, Torreira hi a nghetin an chhuah tir ta a ni.

Belgian forward Mertens hian a contract a hman zawh hnuah Napoli a chhuahsan a, Galatasaray hian season khat daih contract lo ziahpuiin, Galatasaray hi Champions League khel tura an inpet tlin chuan Mertens-a contract hi automatic-in kum khat dangin a inpawtsei bawk ang.

Kum 35 mi Mertens hian kum 2013 khan PSV Eindhoven atangin Napoli hi a pan a, Napoli-a kum kua a awm chhungin game 397 khelin goal 148 a khung a, Napoli club chanchina goal khung hnem ber a ni.