Arsenal chuan an striker Gabriel Jesus chu hlawhtling taka zai a nih thu leh enkawlna tha zawk a dawn zel tur thu an sawi.

Arsenal leh Brazil striker hian Qatar World Cup group-stage an khelhnaah Cameroon an hmachhawn tumin a khupah hliam na tak a tuar a, zai ngai hialin a awm a ni.

Brazil coach Tite pawhin World Cup vawi nga champion tawh Brazil tan Qatar-ah a inlan chhunzawm theih tawh dawn loh thu a lo sawi tawh bawk.

Thu chiang taka puan la awm lo mah se Jesus hian a lo berah thla thum tal chawlh a mamawh a rinawm.

Premier League hmahruaitu Arsenal chuan thawhlehni khan an striker chungchang hi sawiin a hrana enkawlna tha zawk a dawn nghal tur thu an sawi lang tel bawk a ni.

Kum 25 a upa Jesus hian Arsenal tan a thawhhlawk hle a, Premier League-a hma an hruai theih nan pawh hian an player pawimawh ber pawl niin, tun season-a Premier League match a khelh tawh vawi 14 ah goal thun leh assist vawi 5 ve ve a nei tawh.

Tun season-ah Arsenal tan Jesus aia goal thun hnem zawk chu Martin Odegaard chauh hi a ni a, ani hian goal 6 a thun tawh bawk. Assist tam lamah hi chuan Premier League players ah ani aia assist nei hnem hi pahnih chiah an awm, Manchester City midfielder Kevin De Bruyne (vawi 9) leh Arsenal-a a team-mate Bukayo Saka (vawi 6) te chauh hi an ni.

Brazil tan hian kum 2016 atang khan Jesus hi a khel tan a, tum 59 inlan tawhin, goal 19 chu ram tan hian a thun ve tawh bawk. World Cup khelh zawh tak hnuhnung ber 2018 World Cup atang khan Brazil tan World Cup-ah hian a inlan tan chauh a, World Cup match a khelh tawh zat hi vawi 8 a niin, goal a la thun lo a, assist erawh vawi khat chu a nei tawh a ni.