Arsenal midfielder Emile Smith Rowe chuan Fulham a pan dawn ta nge nge niin a lang a, club pahnih te hi Smith Rowe chungchangah an inrem hnai niin The Athletic chuan a tarlang.

Smith Rowe manah hian Fulham chuan £35million an thehchhuak dawn nia report a ni a, club pahnihte hi an inrem a nih chuan, Fulham player lei man to ber a ni ang a, Arsenal player hralh to ber a ni bawk dawn a ni.

Medical nei mai turin Smith Rowe hi an inring tawh a, mimal thil chungchangah pawh inremna an nei nghal mai dawn nia report a ni bawk.

Kum 23 mi attacking midfielder hi Crystal Palace pawhin an ngaihven a, mahse Fulham lamin an hmakhalh ta a ni.

Smith Rowe hi Arsenal academy chhuak a ni a, an hralh hrim hrim chuan Gunners tan chuan hlep hlang a ni dawn tihna a ni.

Fulham hian Smith Rowe manah a hma khan £30million an thehchhuak a, Arsenal-in an lo hnar a, a vawi hnihnaah erawh inremna an nei chho dawn ta a ni.

Bournemouth nen friendly match-a an inhmachhawn zawhin Arteta chu Smith Rowe chungchang zawh a ni a, "Indawrna chu a thleng alawm, a tana tha ber chu tun kan game-a inrawlh rih loh kha a ni," tiin Arteta chuan Smith Rowe chungchang a sawi.

Smith Rowe hian hliam na tak a tuar a, Trossard, Martinelli, Saka leh Jesus te an awm bawk avangin August 2022 atang khan Premier League-ah vawi thum chiah a start.

England tana vawi 3 inlan tawh Smith Rowe hian 2020-21 season leh 2021-22 season khan Arsenal tan top flight game 53 atangin goal 12 a khung.

Kum 2019 khan Arsenal senior team-ah a inlan tan a, Gunners tan game 115 khelin, goal 18 a khung hman a ni.