Fulham chuan London club dang Arsenal atangin Portuguese defender an lalut dawn niin a lang a, Fulham hian Cedric Soares chu an la fel hnai niin chanchinbu mite chuan an tarlang.

Fulham leh Arsenal te hi Cedric-a chungchangah an indawr meka, tun kar tawp lam hian an inbiak fel theih a rinawma, Fulham hian Cedric hi loan-in nge a nghetin an lakluh dawn tih a la chiang lo.

Kum 31 mi hian, tunah hian Arsenal ah pound 100,000 lai kar khatah a hlawh meka, hei hi club hnihte la inrem theih loh chhan ber a nih thu BBC chuan a tarlang.

Cedric hian Arsenal-ah hian season khat dang contract a la nei a, Mikel Arteta hnuaiah inkhelhna hmun a chang thei meuh lova, season kal mekah Premier League game hnih bak a la khel lo.

Fulham manager Marco Silva leh Arsenal right back te hi Sporting Lisbon-ah an lo inhrawn tawh a, Silva hian defender tawnhriat ngah a nih avangin Cedric hi Craven Cottage-a seng luh a tum hle nia sawi a ni.

Arsenal hian Cedric hi kum 2020 January thla khan loan-in Southampton atangin an lalut a, hemi kum nipuiah Southampton-a a contract a zawh avangin Gunners hian a nghetin free transfer in an lalut ta a ni.