Thlasik bazar hun tawp tawh mah se player thenkhat tunah emaw season tawp lama la lak luh theih an awm a, heng te hi an khelhna club-a an contract a zawh tawh vangin free transfer in an lak theih.
Tunah hi chuan football team te'n nipuia transfer hun inhawn leh hma chu player contract nei tawh lo, free transfer-a lak luh bak an ti thei rih tawh lo. Chung player thenkhat chu han tarlang ila-
Isco (Spain, attacking midfielder, kum 30)
Player chhuak thei zingah chuan Isco hi a langsar ber pawl a ni hial mai thei. Season kua teh meuh Real Madrid-a a cham chhungin Champions League vawi nga a chawi a, Club World Cup vawi li chawiin, LaLiga vawi thum a chawi bawk a, Uefa Super Cup vawi thum leh Copa del Rey vawi khat a chawi hman bawk.
Real Madrid atanga a chhuah hnuin nikum mai khan Sevilla a zawn a, a zawm atanga rei vak lo hnuah December thla tawp lam khan a khelhna club Sevilla nen an contract an titawp.
Sime Vrsaljko (Croatia, right-back, kum 31)
Kum 2018 khan Sime Vrsaljko hian World Cup-ah Croatia tana khelin, final-ah France te pawh a lo hmachhawn ve tawh nhe nghe a. Tunah chuan club nei loin a awm mek.
Croatia right-back hi Atletico Madrid leh Inter Milan tan te pawh a lo khel ve tawh thin a, nikum July thla khan Atletico atangin Olympiakos ah insawnin, ram tana vawi 52 lai lo inlan ve tawh Vrsaljko hi kum tawp lamah an chhuahtir a ni.
Jese Rodriguez (Spain, left-winger, kum 29)
Jese hi kum 2016 Champions League final-a Real Madrid in Atletico an hneh tum pawh khan lut pha ve lo zingah a lo tel tawh a. Hemi kum vek hian Paris Saint-Germain ah 25m euros-a lutin, PSG ah pawh hmun a va chang tha meuh lo.
PSG-a a awm lai hian loan-in hmun hrang hrangah a khel kual a. Kumin kumtir lam khan Turkish club Ankaragucu nen an inremna titawpin, club nei loin a awm mek a ni.
Bojan Krkic (Spain, striker, kum 32)
Bojan tih chauha kan hriat lar thin kha a ni, eng nge a chungah hian thleng ta hi ni! Barcelona lamah a hun hmasa lam a hmang chho a, LaLiga title vawi thum a chawi hman bakah Champions League pawh vawi hnih a chawi hman a, Fifa Club World Cup, Uefa Super Cup leh Copa del Rey te pawh a chawi hman vek. Hetih hunlai hian player naupang hma hun nei eng tak a ni thin.
Hemi hnu hian Ajax lamah kalin, Eredivisei te pawh a va chawipui leh a. Stoke City ah season nga chhung cham lehin Premier League goal 14 chiah a thun thei. England a chhuahsan hnu hian Major League Soccer lamah kalin, Montreal Impact tan a va khel leh a, heta tang hian Japan lamah Vissel Kobe tana khel lehin, nikum December thla khan free agent a ni ta a ni.
Jurgen Locadia (Netherlands, striker, kum 29)
Dutch striker Jurgen Locadia hian an ram club PSV tana a khelh laiin league title vawi hnih a chawi hman a. Kum 2018 January thla khan £15m in Brighton a zawm.
Brighton tan hian 2018-19 season chhung khan vawi 26 Premier League ah inlan hmanin, hemi hnu hian loan-in German club Hoffenheim lamah leh MLS club FC Cincinnati tan a khel leh.
A club khelhna hnuhnung ber hi Iran club Persepolis-ah niin, game 9 a khelhah goal 6 a thun hman a. Nimahsela, December thla khan Dutch sawrkar chuan a ram mi leh sa Iran lama awm lo tura a tih avangin a khelhna club hi a chhuahsan a, club nei loin a awm mek a ni.
Renzo Saravia (Argentina, right-back, kum 29)
Saravia hi ram tan vawi 9 a inlan tawh a, kum 2019 a Copa America-a Argentina pathumna an nih tum pawh khan squad ah a tel ve.
Saravia hian Argentina club Racing tan league title te pawh a lo hlawhchhuak tawh a, Portuguese club Porto lamah te pawh a lo khel ve tawh. A khelhna hnuhnung ber hi Brazilian club Boyafogo niin, tunah club nei loin a awm mek a ni.