Lionel Messi leh Cristiano Ronaldo te chuan free kick atangin goal an thun hnem malh malh hle a, set piece hmang thiam ber anga chhal theih an nih hmel viau a, mahse an aia chungnung pakhat a la awm a, Juninho chu free kick atanga goal thun hnem ber a ni.

Lyon player thin Juninho Pernambucano chu khawvela footballer zingah chuan free kick atanga goal thun hnem ber a ni a, goal 77 ngawt mai a thun a. Brazilian midfielder hlui hian 2013 khan football khelh a chawlhsan a, free kick atanga goal thun hnem lamah chuan khum theitu an la awm lo a ni.

Free kick atanga goal thun hnem lamah hian Brazilian star tho Pele chu pahnihnaah a awm a, Pele chuan a vanglaiin free kick atang hian goal 70 a thun tling a. Pathumnaah hian goal 66 thuntu pahnih an awm a, Argentinian Victor Legrottaglie leh Brazilian Ronaldinho te an ni.

Goal 65 thuntu English midfielder hlui David Beckham chu palinaah a awm a, a hnuai chiahah hian goal 62 thuntu pahnih Argentina legend Diego Maradona leh Brazilian star Zico te an awm a. Dutch defender pet na thei tak mai Ronald Koeman chuan goal 60 thunin, Maradona leh Zico te hnuaiah hian a awm a. Top 10-ah hian goal 59 thuntu Marcelinho Carioca leh Sao Paolo goalkeeper Rogerio Ceni te chu an awm bawk a ni.

Top 10 huangah hian tunlaia football khawvela chungnung bera sawi pahnih Lionel Messi leh Cristiano Ronaldo te an lang pha lo a. Argentina superstar Messi chuan free kick atang hian goal 47 a thun tawh a, Portuguese superstar Cristiano Ronaldo chu a ai hian a chungnung hret a, goal 53 a thun tawh a ni.

Set piece atanga goal thun hnem zual, Top 10-a lang pha te hian inkhelh an chawlhsan vek tawh a, tuna la khel mek Messi leh Ronaldo te hi an chet that chhoh viau chuan he huangah hian an la lang ve thei a ni.

Top 10:

1. Juninho - 77

2. Pele - 70

3=. Legrottaglie - 66

3=. Ronaldinho - 66

5. Beckham - 65

6=. Maradona - 62

6=. Zico - 62

8. Ronald Koeman - 60

9=. Ceni - 59

9=. Carioca - 59