The French Football Federation (FFF) chuan World Cup champion lai Argentina player te chet dan avangin thubuai an thehlut. 

FFF president Philippe Diallo chuan FIFA leh Argentina Football Association hnehah an lawm lohna an thlen bawk a, Copa America-a an champion tuma Argentina player thenkhat au hla chu chi inthliarna leh mihring zalenna rahbeh tumna a nih thu FFF hian an tarlang a ni.

Thawhtanni zing khan Argentina chuan Copa America final-ah 1-0 in Colombia an hneh a, Lautaro Martinez goal hmangin an title an humhim. 

An champion lawmnaah Argentina midfielder Enzo Fernandez chuan an chetla lai vel chu instagram lamah a live a, hetah hian France National team sawichhiatna hla an sa a, hei hi FFF chuan an duh lo hle.

2022 World Cup final-ah khan Argentina chuan penalty shootout-ah France an hneh a, khatah khan Argentina fans thahnem tak chuan France team chu au nawmnahin, an player te chu Africa atanga pem khawm an nih thu an tlangaupui.

"France tan an khel ve mai a ni, an nu leh pa te chu thlah pawlh an ni. An nu te khua chu Cameroon a ni a, an pa te khua chu Nigeria a ni, mahse French passport an nei tlat," tih chu au hla atan an hmang.

Argentina supporter ten he hla an sak ang chiah kha Copa America-a an champion hlim hian Argentina player te chuan an sa leh a, instagram footage atanga a lan dan chuan, Enzo Fernandez chu a lang chiang a, mi dang erawh chiang faka hriat theih an ni lo thung.

FFF President Philippe Diallo chuan Argentina player te chet dan hi na takin a dem a, pawm zam theih a nih loh thu leh, chi inthliarna lam thil a nih thu a sawi.