France captain Hugo Lloris-a'n ram tana inkhelh a chawlhsan, vice-captain Varane pawhin ram tana inkhelh a chawlhsan bawk. 

France coach chuan captain thar atan Kylian Mbappe a ruat a, vice-captain atan Antoine Griezmann a ruat bawk.

Griezmann hian captain nih a lo inbeisei ve hle nia report a ni a, captain a ni ta lo hi a lungawi lo hle nia report a ni bawk. 

Griezmann hi a lungawi lo tih chu thu dik a lo ni chiang a, Mbappe pawhin Griezmann hi a kawm thu a sawi chhuak nghe nghe.

Kum 24 mi Mbappe hi kum 2017 atang khan ram tan a inlan tan a, France tan game 66 a khel tawh a, goal 36 a khung tawh. France player chhuanvawr ber a ni mek bawk.

Kum 32 mi Griezmann pawh club lamah tun hnuin che tha lo mah se, ram tan chuan tha a thawh hlawk thin hle. Kum 2014 atang khan ram tan inlan tanin, France tan game 117 a khel tling tawh.

Mbappe chuan, "A lungawi loh avangin Antoine nen kan inbia a, a lungawi lohna hi ka hriatthiampui a ni.

"A dinhmunah ding ve ila, ka lungawi lo ve tho ang tih te ka hrilh a. Kei aiin France tan chuan tawnhriat a ngah daih tawh, kei captain ka nih a, ani vice-captain a nih chhung chuan.

"Ani aia thuneiin ka awm dawn lo tih pawh tlang takin ka hrilh bawk a ni," tiin Griezmann nena an inbiakna a sawi chhuak.