The City Ground-ah Premier League hmahruaitu Liverpool chuan Nottingham Forest an tlawh a, team hnih te 1-1 in an inhnehtawk.

Mual neitu Forest lam hian goal an khung hma hle a, minute 8-na lekah Elanga ball pek chu box veilam aṭangin Wood chuan lei hrulah a chhuih lut.

He goal hi second half minute 66-ah Liverpool chuan an rul. Slot chuan Konate la chhuakin Diogo Jota a dah lut a, Jota hian a ball vawi khat tawhnaah goal a khung nghal.

Tsimikas corner pet ṭha tak chu Jota chuan a tauh a, far post kil sir takah a lut a, he match-ah hian goal dang a luh belh tawh lo.

Second half chu Liverpool ta a ni, inkhel an thunun a, chance pawh an ngah hle. Hetih lai hian Forest tlarhnung te an khel ṭha em em a, goalkeeper Sels leh defender Murillo te an cheṭha fal nalh.

Sels chuan hnai taka Jota shot vawi hnih a dang a, Salah pawhin chance ṭha tak vawi hnih neiin, Sels chuan a lo dan sak bakah, goal line aṭangin Aina chuan a lo dang bawk. Hun tawp dawn lamah Gakpo chuan chakna goal a khung teuh hle a, Sels chuan a lo dan sak leh bawk a ni.

Khelh 20-ah Liverpool chuan point 47 an nei a, Nottingham Forest chu pahnihna niin, anni hian game 21 an khel tawh. Pakhatna leh pahnihna inkar hi point 6 a ni mek.

Inkhelh zawhah Liverpool boss Arne Slot chuan, "Kha bak chu tih theih kan nei lo. Second half-ah kan ṭang hle niin an ngai a, first half-ah pawh kan ṭang hle.

"Tunlaia cheṭha tak team kan hmachhawn a, khelh an har hle. An inkhel hi ka lo en nual tawh a, counter-attack aṭangin goal an khung nasa.

"An counter-attack a hlauhawm a, goal khat kan chhuah ve, mahse minute 98 chhung khan vawi khat chiah counter-attack an nei thei a, inkhel kan thunun a ni.

"Ka duhthusam result a ni lo, player leh fans lam pawh an duhthusam a ni bik lo. Point thum hlawhchhuah kan duh.  Mahse kan theihtawp kan chhuah a, kha bak kha a awm chuang lo a ni," tiin a sawi.