Premier League kaithar Nottingham Forest chuan English midfielder Jesse Lingard lakluh an tum mek tih The Athletic leh Telegraph te chuan an tarlang.

Lingard hian June thla ral rual khan Manchester United-a a contract a hmang zo a, tunah hian free agent a ni mek a, duhtu an awm nual niin a lang.

Loan-a a lo khelh tawhna West Ham nen pawh kum 29 mi hi an indawr mek niin chanchinbu mi te chuan an tarlang a, West Ham leh Forest bakah hian Premier League club dang eng emaw zatin Lingard hi an ngaihven nia sawi a ni.

Lingard hian Abu Dhabi leh Saudi Arabia lam atang pawhin dawrtu a nei a, Mojor League soccer lamah pawh DC United in lakluh an duh bawk.

Season thara Lingard khelhna tur hi a la chiang lo hle a, DC United hi an hnar fel tawh niin chanchinbu te chuan an tarlang a, Abu Dhabi leh Saudi Arabia atanga sawmna a dawn te erawh a la ngaihtuah mek nia tarlan a ni thung.

Lingard hian Premier League-a awm zel chu a duh ber niin The Athletic chuan a tarlang a, season tharah Lingard hi West Ham emaw Forest-ah emaw a khelh a rinawm chho viau.

Lingard hian kar khata pound 180,000 hlawh a phut a, hei hi Hammers hian pek an inhuam lo nia sawi a ni a, Forest erawhin an player hlawh hnem ber ni tura Lingard lakluh hi an hnial lo nia tarlan a ni.