Newcastle United chuan Nottingham Forest atanga Anthony Elanga lak chhuah tumin hma an la a, thawhlehni khan £45million nen Magpies hian Forest an dawr a, hetih lai hian Forest hian Newcastle dawrna hi an hnar niin The Athletic chuan a tarlang.

Nottingham Forest chuan an hmatawng Elanga hi hralh an phal loh thu Newcastle United an lo hrilh a, indawrna hi a kal chho zel dawn em tih erawh a hriat loh. 

Newcastle United hian Bournemouth atanga Antoine Semenyo lak chhuah an tum bawk nia report a ni a, West Ham player Mohammed Kudus pawh an ngaihven bawk nia tarlan a ni.

Season liamta khan Forest tan Elanga a khel tha hle, Premier League-ah goal 6 khungin assist vawi 11 a nei a, Forest chu 7-na nihpuiin, season tharah Conference League an khel thei dawn.

Nikum nipui bazar inhawn lai khan Necastle United chuan £45million ($57m) vel bawkin Elanga hi lak chhuah tumin hma an lo la tawh a, khami tum khan £30m pek phawt a, Paraguay winger Miguel Almiron pek tel an tiam. Mahse Forest lamin an lo hnar a nih kha.

Sweden international hian kum 2023 July thla khan Manchester United atangin Forest hi a zawm a, a man kha £15m vel nia report a ni. Nottingham Forest tan Elanga hian game 83 khel tawhin goal 11 a khung ve tawh.

Hmatawng lamah chuan duh duhna hmunah a chhawr theih a, Nuno Espirito Santo hnuaiah Forest hian 4-2-3-1 formation leh 3-4-2-1 formation an hmang nasa a, Elanga hi player chhawr rim pawl a ni.