Manchester United chuan an forward Mason Greenwood chu an squad-ah an la lut leh ta a, hemi chungchang hian titi a ti tam hle nghe nghe a ni.

A bialnu laka a khawsak dan avangin police hnenah report pek a ni a, kumin January ni 30 khan Police ten an la a nih kha. Khami tum khan United chuan club training zawm an phal sak lo a, an suspend chhunzawm nghal bawk a.

Manchester Police te chuan kum 20 mi hi June ni 24 khan bail phalsak hun chhung an tih sei sak bawk a, a thubuai hi chinfel la ni lo mah se Manchester United chuan Premier League lamah Under 21 team-ah nilaini khan an ziak lut a, Europa League squad lamah pawh telh a nih thu English media te chuan an tarlang.

Greenwood hian March 2019 khan United senior debut a khel tan a, Red Devils tan game 129 atangin goal 35 a khung tling ve tawh a ni.

Season hmasa Premier League tantirah khan Solskjaer-a hnuaiah a rawn che ropui khawp mai a, bul a tan thain goal pawh a khung chho nual a nih kha. Chutih laiin heng thubuai a neih avang leh Ronaldo an neih takah khan hmun a chang tam lo a, a inkhelh chang pawhin ngai a awh thei lo. Social media lamah a khawsak dan a darh chho bawk nen, a football career chu a tawp chho tawh mai dawn nia ngaih a ni hman.

Hmeichhe chunga hleilenna thubuai awrh mek ni mah se United-in hetia squad-a an telh leh avang hian sawisel tu pawh a thahnem hle nghe nghe, a thubuai hi engtin nge an chinfel dawn tih hriat a la ni lo a, Manchester United chuan he English forward talent nei tha tak hi chance pek an tum lek mek niin a lang.