Portugal captain Cristiano Ronaldo chuan international football khelh chhunzawm zel a la tum thu a sawi a, ram tana tha thawh thei la nia a inhriat chhung chu inkhelh a la tum a ni.

Kum 39 mi hian Portugal tan game 212 lai a khel tawh a, ram tan hian kum 20 chuang khel tawhin, goal 130 a khung tawh a, ram tana goal khung tam ber record chelh lai mek a ni bawk.

"Ka rilruah chuan, inkhelh bul tan ziah tur niin ka la inngai. Ka career a tawp hma hi chu inkhelh bul tan turah ka indah tawp. Chutih laiin coach te thutlukna erawh ka zah em em thin.

"Ram tan hian tha la thawh zel ka duh a, tha thawh thei tawh lo nia ka inngaih hunah erawh ka chawl ang.

"Ka chhia leh tha hriatna hmangin ka chawlh hun tur chu ngun takin ka ngaihtuah dawn a ni. Keimah ka inhrechiang a, ka tih theih la ka hria, chuvang chuan ram tana inkhelh chhunzawm zel hi ka la duh a ni," tiin Cristiano Ronaldo chuan a sawi.

Ronaldo hian a chawlh hun tur a sawi thei bik lo a, tunah an hmachhawp lian ber chu Nations League a ni.

"Chawl tur hian ka la indah chhin lo a, chhunzawm zel turin ka la phur em em zawk a ni. 

"Nations League-ah kan lo champion tawh a, tuna kan tum leh hmasak ber chu Nations League-a champion leh a ni. Hun rei tak ka thlir lo, tun zel hi a ni ka thlir ni," tiin Ronaldo chuan a sawi bawk.