Pathianni zan zanlai Serie A match-ah Fiorentina chuan 2-1 in AC Milan an hneh a, Man United goalkeeper hlui De Gea chuan penalty vawi hnih save-in a team a chakpui.

Minute 20 an khel tling vel chiah tihin Fiorentina chuan penalty an hlawhchhuak, he penalty hi Moise Kean chuan petin, Milan goalkeeper Maignan chuan tha takin a lo dan sak.

Darkar chanve an khel tling vel chiah tihin Yacine Adli chuan box veilam sir atangin bottom corner-ah mawi lutukin lei hrulah a chhuih lut a, si khat faiin Fiorentina chuan hma an hruai.

First half tawp dawn tepah Milan chuan penalty an hlawhchhuak ve ta. He penalty hi Theo Hernandez chuan petin, Spanish goalkeeper De Gea chuan tha lutukin a lo dang.

Second half tan a ni a, Milan chuan penalty an hlawhchhuak leh. He penalty hi Tammy Abraham chuan a pet a, De Gea chuan tha takin a lo save leh bawk.

Minute 60-ah Milan chuan goal an khung ve ta nge nge a, mual veilam sir atanga Theo Hernandez cross chu Christian Pulisic chuan a volley a, De Gea a che hman lo, 1-1 a ni.

Minute 15 vel a la awmin De Gea thawhrah Fiorentina lamin an tel leh. De Gea chuan ball na takin a pet a, hei hi Moise Kean chuan Gudmundsson tan dahremin, ani hian near post-ah kawt zetin a chhuih lut a, 2-1 in Fiorentina chuan hnehna an chang ta a ni.

He match-ah hian red card pahnih phawrh a ni a, hun tawp dawn lamah Fiorentina coach Palladino hnawhchhuah a ni a, hun tawp rualin Theo Hernandez hnawhchhuah a ni bawk.

Tun season-ah a vawi hnih nan Fiorentina an chak ve ta a, khelh 7 atangin point 10 an hlawhchhuak a, table-ah 11-na an ni mek. Hmahruaitu Napoli chu point 6 in an phak lo mek a ni.