Vawiina FIFA ranking thar ber tihchhuahah, India chu spot hnihin an tlahniam a, 105-na atangin ranking thar berah hian 107-naah an tla thla.

India hian tun thlaah international friendly game vawi hnih khelin, Nepal vawi hnih an hmachhawn a, vawi khat chakin, vawi khat India leh Nepal-te hi an inhnehtawk.

India hi tunah hian 2021 SAFF Championship khel turin an buatsaih mek a, SAFF Championship group stage-ah hian Nepal nen an awm ho.

SAFF Championship-ah hian India leh Nepal bakah Bangladesh, Sri Lanka leh Maldives te an awm a, Nepal hi 168-na niin, Bangladesh hi 189-na an ni a, Sri Lanka hi 205-na niin, Maldives hi 158-na an ni bawk a ni.

Asian Football Confederation (AFC) team zingah Iran an chungnung ber a, Iran hi FIFA ranking-ah 22-na niin, Japan chuan an dawt a, Japan hi 26-na an ni ve thung.

FIFA ranking-ah Belgium chu pakhatna an la ni chhunzawm zel a, pahnihnaah Brazil awmin, England chu pathumnaah an chho bawk a ni.