Khawvel pumpuia football thuneitu sang ber chu FIFA a ni tih kan hre vekin a rinawma, FIFA president chu Gianni Infantino a ni tih pawh kan hre vekin a rinawm.

FIFA president Infantino-a hming hi hre fo tawhin, a hmel pawh hmu fo tawh mah ila, a mah hrechiang hi kan tamin a rinawm lem lova, a chanchin tlema zawng tarlan kan tum dawn a ni.

Infantino hi a hmingpum chu Giovanni Vincenzo “Gianni” Infantino a ni a, kum 1970 March thla ni 23 khan Brig, Switzerland-ah piangin, tunah hian kum 50 mi a ni mek.

Infantino hi Switzerland-a piang ni mahse a nu leh pate hi Italian, Switzerland-a pem an ni a, hemi a nih avang hian Infantino hian Italian citizenship leh Swiss citizenship a nei ve ve.

Infantino hi tunah hian sawi tawh angin FIFA president a ni meka, he hna hi kum 2016 atang khan chelh tawhin, kum 2019 khan thlan tlin nawn a ni bawk.

Infantino hian University of Fribourg-ah law (dan) zirin, a hma chuan University of Neuchatel-ah Secretay General of the International Center for Sports Studies (CIES) hna a chelh reng thin,

Kum 2000 khan Infantino hi UEFA-ah a inhnamhnawih chho tana, kum 2004 January thla khan Director of UEFA’s Legal Affairs and Club Licensing Division atan ruat a ni. Kum 2007 khan Infantino hi UEFA Deputy General Secretary a ni chho a, kum 2009 khan Secretary General of UEFA a ni leh bawk.

UEFA-a a awm lai hian UEFA Financial Fair Play dan chu UEFA hian an zam thara, Infantino hi Euro 2016-a team 24 an awmna tura hma la ber tu a ni bawka, UEFA Nations League din kawngah pawh a inhnamhnawih thuk hle.

Kum 2016 February thla khan Infantino hi FIFA Extraordinary Congress-ah FIFA president pakuana atan thlan tlin a ni a, a campaign hla ber pakhat chu FIFA World Cup-a team 40 awm tir a ni nghe nghe.

Hetah hian Infantino hi kum 3 atan president atana thlan tlin a ni a, Italian mi FIFA president ni thei hmasa ber niin, kum 2019 June ni 5 khan FIFA president atan hian a vawi hnih nan thlan tlin a ni leh.

Infatino –a nupui hi Lebanese nu Leena Al Ashqar a ni a, an pahnih hian fa pali neiin Alessia, Sabrina, Shania Serena leh Dhalia Nora-te an ni. Infantino hi Italian club Inter Milan fan a ni.

Infantino hian tawng chi hrang hrang a thiam hnem hle a; Italian, Portuguese, Spanish, French leh German te a thiam nal bakah English pawh a thiam hle a, Arabic pawh a thiam suih suih bawk a ni.