FIFA game khel thinte tan thu lawmawm tak a awm thar a, EA Sports FIFA 20 mobile version-ah chuan Indian Super League pawh a tel ve tawh dawn a ni.

Electronic Arts leh Indian Super League te chuan FIFA game chungchanga inremna neih theih dan tur an ngaihtuah a, kuminah hian ISL telna FIFA 20 chu khelh theih a ni dawn niin an sawi.

“India ram football tan hun ropui tak a inher chhuak a tih loh theih loh a, khawvela game lian leh ropui ber pawlah India rama football league a tel ve dawn a. Hetiang a nih takah chuan ISL chu khawvel hmun zau zawkah miin an hriat theih phah dawn a ni,” tiin ISL lam kaihhnawih mi pakhat chuan a sawi chhuak.

EA Sports FIFA 20 chhuak thar turah hian thil thar eng eng emaw an telh nual dawn niin developer te chuan an sawi a. He game hi miin an khelh nasat lehzual theih nan a hmaa la awm ngai lo hi an belh nual dawn a, hetiang kawngah hian EA chuan ISL pawh hi mobile version-ah chuan an telh phah a. ISL a tel thar dawn chuan India rama football ngainatute chu a hip hnem viau an beisei hle.

A hma deuhin India national team te chu FIFA game-ah hian an lo telh tawh a. 2012 kumah khan FIFA 13 ah EA chuan India national team chu an telh a, India rama he game khel thinte chuan an lawm phian nghe nghe a ni.

Hemi hnuah hian India ramah football a thang chho nasa hle a, Indian Super League chu 2014 atang khan an ti tan a, football boruak chhem alhtu pawimawh tak pakhat a tih theih a ni.

Electronic Arts chuan ISL legal rights chu an hauh vek ang a, club crest, player leh stadium te chu legal rights hian a huam tel vek ang a. Hetianga hman phalna an hauh hnuah hian ISL chuan EA atang hian sum an dawng thin dawn a ni.

Kuminah ISL chu FIFA 20 mobile version-ah an telh phawt ang a, a hlawhtling ta viau a nih chuan desktop lamah te leh a dangah pawh an telh ve leh dawn a, Xbox leh Sony Play Station lamah pawh belh a nih phah ang.