FIFA nena thawk ho American Game company EA Sports chuan Champions League rights an nei dawn nge dawn lo tih chu tunlai FIFA Gamer te titi ber a ni chho mek.

Konami company siam Pro Evolution hian Europe league lian rights nei lo mahse UEFA Champions League rights an nei tlat mai a. Graphics leh thil dang dangah hma an sawn chak hle bawk nen, fans an hip kher mai. Hetih lai hian FIFA nena thawk ho leh Europe league lian ber ber te nena thawk ho EA Sports erawh an la khan lo hle thung.

Kum 2009 atang khan Konami hian Champions League an nei a, an deal hnuhnung ber chu kum thum liamta khan niin, kum thum chhung atan UEFA leh Konami te hian thawh hona thuthlung an ziak, kha an inremna kha kumin June thla hian a tawp tawh mai dawn, an thawk ho chhunzawm zel dawn nge dawn lo tih an la puang si lo, a nihna takah chuan thla thum chiah a awm tawh si a, thawk ho leh tur chu nise kumin kum tirah thu thar an neih rin a ni.

Sports website dreamteamfc chuan UEFA nena an thawh hona chungchang zawtin Konami hotute an bia, anni chuan an chhan theih loh thu an lo hrilh. Heng te a nih avang hian EA Sports leh UEFA an thawk ho mai dawn nia ngaihna lian tak a awm mek a ni. EA Sports hian Champions League an nei thei a nih ngat chuan Konami chu nasa takin an pet dawn chiang a, Konami tan chuan thawh leh harsa tak a nih ngei a rinawm.