2016 FIFA Interactive World Cup final chu March ni 23, 2016 khan New York Harlem’s Apollo Theater-ah khelh zawh a ni a. Final-ah Mohamad Al-Bacha (Denmark) chuan away console rule hmangin Sean Allen (England) a hneh a, FIWC champion a ni ta a ni.
Grand Finalists mi 32 te chuan Xbox One leh PlayStation 4 hmangin an intum kual a, hetah hian Mohamad Al-Bacha chu a chungnung ta a ni. Final hi two-legged system-a khelh niin, PlayStation 4-ah khelh hmasak a ni a, Xbox One-ah 2nd leg khelh a ni.
Final hmuhnawm tak chu
Allen chuan Xbox One Console a thlang a, Al-Bacha chuan PlayStation 4 thlangin, mahni console thlana khelh chu home game anga ngaih a ni. First leg PlayStation 4-a khelhah 2-2 in an inhnehtawk.
Al-Bacha hian France team a thlang a, Allen erawh chuan Brazil team a thlang. First leg-ah hian Al-Bacha chuan 31st mins-ah goal hmahruai a khung a. First half tawp dawnah Neymar hmangin Allen chuan a si phurh a rul. Second half-ah Matuidi hmangin Al-Bacha chuan goal khung leh mahse hun tawp dawnah Hulk hmangin Allen chuan a si phurh a rul leh a. Hun tawp dawn tak takah Allen chuan goal khungna chance tha zet nei mahse Lloris chuan a lo dang a, 2-2 in an inhnehtawk ta a ni.
Second leg chu Xbox One-a khelh niin an team thlan ngai ve ve an thlang a, away-ah Allen chuan goal hnih a khung avangin beisei sang tak nei chungin a khel. Al-Bacha bawk chuan goal a khung hmasa leh ta a. Hulk hmangin Allen chuan a siphurh a rul leh. Hemi hnu lawk hian Allen chuan Douglas Costa hmangin goal a khung a, a vawi khat nan hma a hruai ve ta. Aggregate chuan 4-3 a ni ta a. Allen chuan Costa hmangin goal dang a khung leh ta, 3-1 in hma a hruai ta a.
Al-Bacha chuan tlawm a tum lo, hun tawp dawn minute 89-ah free kick atangin goal khat a khung, 3-2 a ni a, aggregate chuan 5-4 a ni. A tawp nan tak tak nawr huk tumin a formation chu 4-2-4 ah a thlak, 90+2 mins-ah Griezmann hmangin Al-Bacha chuan a si phurh a rul a, box chhungah Griezmann chuan ball chak taka umlutin a ke veilam chuan top corner-ah a chhuih lut ta. Hun a tawp chhunzawm, 3-3 in an inhnehtawk a, aggregate chuan 5-5 a ni a. Mahse away console goal rule hmangin Al-Bacha chuan hnehna a chang ta a ni.
Kum 17 mi Al-Bacha hi he tournament-a naupang ber niin, inkhelh zawhah,"Hun tawp dawnah khan goal ka khung a, goal dang pawh ka khung ka inring nghal a, ka khung ta reng a ni." tiin a sawi. Semi final thleng zingah hian nikum lama semi finalist Dylan Bance chiah semi final lut nawn niin, tun tumah hian a vawi khat nan match tin hi YouTube-a LIVE Stream a ni nghe nghe. A hmunah hian Frank Lampard leh David Villa te pawhin an chhim a, online-in Footballer lar tak takte pawhin an thlir bawk a ni.
Champion Al-Bacha hian USD 20,000 cash Prize a dawng, 2017 January thlaa FIFA Ballon d'Or award semnaah a kal bawk ang. Pahnihna hian cash prize USD 5,000 a dawng bawk a ni.
Semi-final results
Mohamad Al-Bacha (DEN) 2-1 Ivan Lapanje (SWE)
Sean Allen (ENG) 3-0 Dylan Bance (FRA)
Final
First leg: Sean Allen (ENG) 2-2 Mohamad Al-Bacha (DEN)
Second leg: Mohamad Al-Bacha (DEN) 3-3 Sean Allen (ENG)
Pictures credit : FoxSports