Liverpool captain thar Jordan Henderson chu khawvela Sports lama video game hralh kal ber FIFA Game cover-ah a chuang ta vang mai le.
FIFA 16 UK leh Ireland edition-ah hian FIFA Game siamtu EA Sports te chuan Messi kianga ding tur mipui vote an la a, Liverpool midfielder Henderson, Man City forward Sergio Aguero, Tottenham striker Harry Kane leh Chelsea goalkeeper Thibaut Courtois te chu chhawp chhuah niin, kum 25 mi Liverpool captain thar chuan vote a hmu sang ber a, Messi kiangah FIFA 16 cover-ah a chuang ta a ni.
Henderson chuan,"FIFA cover-a vote hmanga ka chuang ve ta ringawt hi ka tan chuan chawimawina sang tak a ni. mipui ten min thlanga, hetia FIFA 16 cover-a Messi kianga ka ding ve hi a ropui dangdai tak zet a ni.
"Liverpool player zinga he game cover-a lang hmasa ber ka ni hi ka inchhuang lehzual. Hmun hrang hranga Liverpool fans ten min support a, Footballer naupangte suangtuahna a taka ka tawng hi ka lawm hle a ni," tiin a sawi.
Liverpool fans an tam si a, an theih tawpin an midfielder an vote chho, Henderson a tling chho mai dawn nia a lan tak avangin UK leh Ireland-a FIFA gamer te an lungawi lo hle a, 'Henderson a chuang a nih chuan a phu dawn si lova, chumi ai chuan FIFA 16 hi ka lei lo mai ang,' ti an tam hle. Hei tunah chuan a chuang ta tak tak chu a ni si a, an leilo tak tak angem ? I lo thlir ang.