Joao Felix kha Atletico Madrid khan £113m-in an lei a nih kha, Felix hian a man a phu em?
2018-19 season khan Felix chuan goal 20 khungin assist vawi 8 a nei a, Benfica rawlthar lakah khawvel mit a fu, Golden Boy award pek a ni chhunzawm bawk. Chu ve leh Atletico Madrid chuan Benfica atangin £113m laiin an lei chhuak a nih kha.
Beisei sang tak neiin Atletico Madrid chuan an chhawr tan ta, chutih laiin Atletico Madrid tan a season hmasa berah game 22-ah inkhelh bul tanin goal 4 chiah a khung. Portugal-a a khelh dan angin Spain-ah a khel thei ta reng reng lo, viak tha tak nia ngaih thin kha a che hleithei ta der lo mai.
Season hmasaa Atletico Madrid-in La Liga title an lak pawh khan tha thawh hlawk ber zingah a tel ve lo. Season tawp lamah phei kha chuan Diego Simeone khan a chhawr tha lo a, game hnuhnung 8-ah a start lo, goal pawh a khung hek lo.
Atletico Madrid boss Diego Simeone hian player tharum ngah lam a ngaina nia ngaih a ni a, Felix hi a mi rinzawng a ni lo niin Spanish media te chuan an tarlang chuai chuai a nih kha.
Sawiselna tam tak karah kumin a rawn inher chhuak a, kum 22 mi Portuguese forward Felix chu a rawn puitling chho mek niin a lang.
February ni 19 khan Osasuna an tlawh, Simeone chuan inkhelh bul tan turin a thlang, inkhelh tan atanga minute 3 chhung lekin goal a khung ta mai. Tin, Suarez-a goal khung tur a siam sak bawk a, si thum faiin hnehna an chang a nih kha.
Ni li a liam a, Champions League Round of 16-ah Manchester United an hmachhawn, inkhelh tan atanga rei lote chhungin mawi zetin a tauh goal leh, De Gea a che hman lo chiang hle.
Real Betis an hmachhawn tumin goal hnih a khung a, Cadiz an hmachhawn tumin goal khat a khung leh. Old Trafford-a Lodi-a'n goal a khung theih nan tha a thawh hlawk hle bawk. Rayo Vallecano an hneh tuma Koke-a goal khung tur a siam sak bawk a, Inrinni liamtaa 4-1 a Deportivo Alaves an hneh tumin goal hnih a khung leh bawk a nih kha.
Thawhlehni zana Manchester City an hneh loh tumin inkhelh bul a tan leh a, hetih lai hian an coach-in counter attack hmang chauha City a hmachhawn avang khan a che hleithei lo.
Kumin Felix a rawn che tha chho hle, a tlan chak a, ball a thiamin a finishing pawh a tawih, chutih laiin rawlthar a nih laia £113m zeta Atletico Madrid-in an lei khan a man a phu em? Comment-na lamah khan member ten ngaihdan kan sawi ho dawn nia.