World number one hlui Andy Murray chuan, tennis khelh a chawlhsan hun tur a la hriat loh thu a sawi a, a chawlh hunah Roger Federer anga thlahna a phu ve loh thu a sawi bawk.

Grand Slam title pathum la tawh Murray hi hliamin a tlakbuak nasa hle a, kum 2019 khan a kawng a dam hleihtheih loh avangin a chawl teuh viau nghe nghe a, tunah erawh pangngai takin a inkhel chho leh mek a ni.

Laver Cup khelh zawh takah ropui takin Grand Slam title 20 la tawh Roger Federer thlah a ni a, Team Europe-ah Murray hi Federer te nen hian awm hovin, mahse Team World an hneh ta lo a ni.

Scottish player kum 35 mi Murray chuan a chawlh hun tur zawhna chhangin, “Chawlh lam ka la ngaihtuah lova, ka chawl a nih pawhin Roger anga thlahna kha ka phu lo. Roger kha chuan a phu takzet.

“Ka event khelh hnuhnun ber tur chu ka puang ve ngei turah ka ngai a, mahse a hun erawh ka la hre lo. Competitive tennis ka la khel reng a, top player te lakah pawh ka la khel thei viau a ni,” tiin a sawi.

Murray hi Wimbledon-ah vawi hnih a lo champion tawh a, US Open-ah vawi khat a lo champion tawh bawk a, mahse kum 2016 hnuah Grand Slam final a la lut leh lo a ni.