South Korean player tha Son Heung-min hi kum 30 mi a ni ve tawh a, a vanglai a tawng chho mek, club dangin lei chhuah tum selang chuan Tottenham hian an chhuahtir phal hauh lo ang. Harry Kane pawh Spurs-in an uibet kha a ni a, Son-a tel lo hi chuan Kane pawh hi a turu vak kher lo maithei, chutiang khawpa Tottenham tana player tangkai chu a ni a.

Hetih lai hian a thiamna leh a records ngaihtuah chuan media lam hian an fak hreh deuh tlat ni hian a lang a. Inkhel facebook page leh youtube channel lamah te pawh Son-a goal khung dan leh a records thenkhat kan han tarlang a, comment-na lamah, "English player chu ni selang chuan hei ai hian English media ten an fak ang," tih hi kan hmu hnem em em.

Season liamta Premier League-ah khan game 35 atangin goal 23 a khung a, Mohamed Salah nen joint top scorer an ni kha a ni a, Premier League-ah hian game 239 a khel tawh a, goal 96 lai a khung tawh bakah assist pawh vawi 47 a nei tling tawh. Golden Boot hi vawi khat a dawng tawh a, player of the month hi vawi 3 a ni tawh a, goal of the month lawmman vawi 2 dawng tawhin goal of the season vawi 1 a dawng tawh bawk.

Player consistent ber pawl a ni,     2015/16 season khan Spurs tan inlan tanin game 28 atangin goal 4 a khung a, 2016/17 season khan game 34 atangin goal 14 a khung. 2017/18 season leh 2018/19 season-ah goal 12 ve ve a khung a, 2019/2020 season khan goal 11 a khung.

2020/21 season a rawn inherchhuak a, league game zawng zawng a khel kim teuh hle, game 37 atangin goal 17 a rawn khung hem mai. Season liamta khan game 35 atang khan goal 23 a khung tling ta bawk a. Tun season erawh goal khung tam zawngin bul a tan tha tawk lo deuh, mah se September ni 17-a Leicester City nen an inhmachhawn tum khan bench atanga rawn lutin hattrick a rawn siam a nih kha.

Goal 4 lai pawh khung thei tur kha a ni a, vawi khat uiawm deuhin a hlah a, goal hi a khung chho leh dawn ta niin a lang. A physical a tha a, a tlan chak, ball pawh chak tak takin a keng thei, thiante tan hmun thawl a siam thiam, a finishing pawh a tawih em em bawk. 

Tunlai Europe-a khel player zingah chuan theihna nei sang ber zing ami a ni mek. Tin, a khelhna league hi a hautak em em a, league hautak em em-ah game 239 atanga goal 96 a khung thei hi a that zia ti langtu a ni chiang mai. Season 7 chhungin assist vawi 47 a nei thei a, records leh statistics hi chu lo dahtha ta ila, a inkhel en thinte chuan thiante tana a tangkai thin zia chu kan hmu vek thin ang.

English rawlthar thenkhat, season khat emaw vel an rawn che tha ve dek dek a, an man a to nghal em em thin. Hei hi a chhan chu media lamin an theihna leh thiamna baka an fak thin vang a ni. Tin, English player thenkhat ropui takin season khat an han hmang a, Ballon d'Or dawng thei khawpa thiamna leh theihna nei angin English media ten an chhuah thin a nih kha.

Asian tlangval Son Heung-min erawh English media ten an fak hreh deuh thin niin a lang a, ngelnghet takin Premier League-ah a inlan chho ngar ngar a, a thiamna leh theihna pawh khawvelin hmu mah se fak zui a hlawh lem lo thin. Asian a nih avang hian lawm a hlawh lo te pawh a ni mahna, season liamta phei kha chuan ani aia tha Premier League-ah mi dang an awm chuang awm bik love, rokhawlhna dang a nei lo a nih chuan Conte-a hnuaiah trophy eng emaw tal a hlawhchhuah ve ngei a rinawm.